కీలక వడ్డీరేట్లను యథాతథంగా ఉంచడంపై ఆర్బీఐ గవర్నర్ శక్తికాంతదాస్ విభిన్నంగా స్పందించారు. మందగమనాన్ని పరిష్కరించడానికి ఆర్బీఐ దగ్గర వడ్డీరేట్లు మాత్రమే కాకుండా, అనేక ఇతర మార్గాలూ ఉన్నాయని పేర్కొన్నారు.
ఆర్బీఐ తన ఆరో ద్రవ్య పరపతి విధాన సమీక్షలో... 2020-21లో దేశ జీడీపీ వృద్ధిరేటు 6 శాతంగా ఉంటుందని అంచనా వేసింది. స్వల్పకాలంలో ద్రవ్యోల్బణం పెరుగుతుందని, దీర్ఘకాలంలో అనిశ్చిత ద్రవ్యోల్బణం కొనసాగే అవకాశముందని పేర్కొంది.
జాతీయ గణాంక కార్యాలయం (ఎన్ఎస్ఓ) జనవరి 31న విడుదల చేసిన అంచనాల్లో... వాస్తవ జీడీపీ వృద్ధిని 2019 మేలో అంచనా వేసిన 6.8 శాతం నుంచి 6.1 శాతానికి సవరించింది. ఆర్థికవ్యవస్థలోని ఉత్పత్తి-డిమాండ్కు మధ్య అంతరాలున్న నేపథ్యమే ఇందుకు కారణం.
యథాతథం...
ఆర్బీఐ ద్రవ్య విధాన కమిటీ (ఎంపీసీ) రెపో రేటు (5.15 శాతం)ను మార్చలేదు. అయితే వృద్ధి పునరుద్ధరణకు కృషిచేస్తామని స్పష్టం చేసింది. భవిష్యత్తులో వడ్డీరేట్లు తగ్గించే అవకాశం ఉందని సూచించింది.
ఇదీ చూడండి: కీలక వడ్డీరేట్లు యథాతథం: ఆర్బీఐ
