'50 మీటర్ల దూరంలో పెట్రోల్​ బంకులు ఉండరాదు'

పెట్రోల్​ బంకుల వల్ల పర్యావరణానికి హాని కలుగుతుందని కేంద్ర కాలుష్య నియంత్రణ మండలి తెలిపింది. పాఠశాలలకు, నివాసాలకు దూరంగా ఉండేలా  నూతన నిబంధనలను విడుదల చేసింది. వీటిని చమురు సంస్థలు కచ్చితంగా పాటించాలని ఆదేశించింది.

పెట్రోల్​ బంకుల కారణంగా పర్యావరణం ప్రభావితమవుతోందని కేంద్ర కాలుష్య నియంత్రణ మండలి (సీపీసీబీ)ఆవేదన చెందుతోంది. ఈ నేపథ్యంలో వీటికి సంబంధించి జాతీయ హరిత ట్రైబ్యునల్ సూచనలకు అనుగుణంగా నూతన​ మార్గదర్శకాలను జారీ చేసింది. పాఠశాలలు, ఆస్పత్రులు, నివాస ప్రాంతాలకు కనీసం 50 మీటర్ల దూరంలో పెట్రోల్​ బంకులను ఏర్పాటు చేయాలని చమురు సంస్థలను ఆదేశించింది. వేపర్​ రికవరీ సిస్టెమ్​(వీఆర్​ఎస్​)ను ప్రతి బంకులో ఏర్పాటు చేయాలని తెలిపింది.

నూతన నిబంధనల్లో కొన్ని...

• పాఠశాలలు, ఆస్పత్రులు, నివాస ప్రాంతాలకు 50 మీటర్ల లోపు పెట్రోల్ పంపులను ఏర్పాటు చేయకూడదు.
• ఒకవేళ 50 మీటర్ల దూరంలో ఉన్నట్లైతే పీఈఎస్​ఓ నిబంధనల ప్రకారం మెరుగైన భద్రతా పరమైన చర్యలను కచ్చితంగా పాటించాలి.
• నూతనంగా ఏర్పాటు చేసే బంకుల్లో వేపర్​ రికవరీ సిస్టమ్​ (వీఆర్​ఎస్​ )ను ఏర్పాటు చేయాలి.
• వీఆర్​ఎస్​ ఏర్పాటులో విఫలమైతే కాలుష్య నియంత్రణ మండలి విధించిన పరిహరం చెల్లించాల్సి ఉంటుంది.

ఈ నూతన నిబంధనలను ఐఐటీ కాన్పూర్​కు​ చెందిన సభ్యులు, నేషనల్ ఎన్విరాన్‌మెంటల్ ఇంజినీరింగ్ రీసెర్చ్ ఇనిస్టిట్యూట్ (ఎన్​ఈఈఆర్​ఐ), ది ఎనర్జీ అండ్​ రిసోర్సెస్ ఇనిస్టిట్యూట్ (టీఈఆర్ఐ), పెట్రోలియం, సహజ వాయువు మంత్రిత్వ శాఖ, కేంద్ర కాలుష్య నియంత్రణ మండలి సభ్యులతో కూడిన నిపుణులు సంయుక్తంగా రూపొందించారు.

ఇదీ చూడండి: 'కశ్మీర్​'పై చైనా కుయుక్తులు- వ్యతిరేకిస్తామన్న ఫ్రాన్స్​