సీఏఏపై యువతను తప్పుదోవ పట్టిస్తున్నారు: మోదీ

పౌర చట్టం(సీఏఏ)పై రాజకీయ లబ్ధి కోసం ఓ వర్గానికి చెందిన యువతను కొందరు తప్పుదోవ పట్టిస్తున్నారని విమర్శించారు ప్రధాని మోదీ. బంగాల్​లో రెండో రోజు పర్యటనలో భాగంగా హౌరాలోని బేలూర్​ మఠంలో నిర్వహించిన సభలో ఈ వ్యాఖ్యలు చేశారు. దేశ ప్రజలకు అర్థమైనా.. సీఏఏను అర్థం చేసుకోవడానికి విపక్షాలు సిద్ధంగా లేవని ఆరోపించారు.

పౌరసత్వ చట్ట సవరణపై ఒక వర్గానికి చెందిన యువతను తప్పుదోవపట్టిస్తున్నారని ప్రధానమంత్రి నరేంద్ర మోదీ ఉద్ఘాటించారు. దీని ద్వారా ఎవరి పౌరసత్వాన్ని తొలగించమని హామీనిచ్చారు.

రెండు రోజుల బంగాల్​ పర్యటనలో ఉన్న మోదీ.. ఈ రోజు ఉదయం బేలూర్​ మఠాన్ని సందర్శించారు. అనంతరం జరిగిన సభలో సీఏఏను ప్రస్తావించారు. పౌర చట్టంపై ఉన్న సందేహాలను తొలగించడం తమ బాధ్యతగా పేర్కొన్న ప్రధాని.. రాజకీయ లబ్ధి కోసం విపక్షాలు యువతను రెచ్చగొడుతున్నాయని మండిపడ్డారు.

"పౌర చట్టం (సీఏఏ) ద్వారా మేము పౌరసత్వాన్ని కల్పిస్తున్నాం. ఎవరి పౌరసత్వాన్ని తొలగించట్లేదు. ఇది కాకుండా.. ఈ రోజు ఏ ధర్మాన్నైనా పాటించే వ్యక్తి.. దైవత్వాన్ని నమ్మినా, నమ్మకపోయినా పర్లేదు. భారత రాజ్యాంగంపై విశ్వాసం ఉన్న వ్యక్తికి ప్రభుత్వ ప్రక్రియల అనంతరం పౌరసత్వాన్ని కల్పిస్తాం. ఇదంతా మీకు అర్థమైందా?అర్థమైంది కదా? విద్యార్థులకు కూడా అర్థమైంది కదా? కానీ రాజకీయాలు చేసేవారు మాత్రం ఈ విషయాన్ని అర్థం చేసుకోవటానికి సిద్ధంగా లేరు."

--- నరేంద్ర మోదీ, ప్రధానమంత్రి.

హింసకు గురవుతున్న మైనార్టీలకు యవత అండగా నిలుస్తుడటంపై మోదీ హర్షం వ్యక్తం చేశారు. 21వ శతాబ్దంలో దేశంలో మార్పులు రావడానికి యువతే ప్రధాన శక్తిగా నిలబడాలని అన్నారు.

బేలూర్​ మఠంలో...

వివేకానందుడి జన్మదినం సందర్భంగా.. హైవ్​డాలోని బేలూర్‌ మఠంలోని రామకృష్ణ మిషన్ ప్రధాన కార్యాలయంలో ప్రత్యేక ప్రార్థనలు నిర్వహించారు మోదీ. స్వామి వివేకానంద ఆలయాన్ని సందర్శించి నివాళులర్పించారు. అనంతరం బేలూర్‌ మఠంలోని ప్రధాన ఆలయాన్ని సందర్శించిన మోదీ.. రామకృష్ణ పరమహంస విగ్రహం వద్ద అంజలి ఘటించారు. మఠంలోని సాధువులు, యోగులతో ప్రధాని ప్రత్యేకంగా సంభాషించారు

ఇదీ చూడండి : బేలూర్​ మఠంలో మోదీ.. వివేకానందునికి నివాళి