వీడియో షేరింగ్ యాప్ 'టిక్ టాక్' ఎంత ప్రాచుర్యం పొందిందో నేటి తరానికి ప్రత్యేకించి చెప్పనక్కర్లేదు. యువతతోపాటు, గృహిణులు, పెద్దలు చాలా మంది ఈ యాప్లో మునిగిపోతూ.. ప్రపంచాన్నే మరిచిపోతున్నారు. అయితే ఈ టిక్ టాక్ ద్వారా యువత పెడ ధోరణి పడుతుందని ఆరోపిస్తూ, యాప్పై నిషేధం విధించాలని కోరుతూ బాంబే హైకోర్టులో ప్రజాప్రయోజన వ్యాజ్యం దాఖలైంది.
ముగ్గురు పిల్లల తల్లైన ముంబయి నివాసి హీనా దర్వేశ్ నవంబర్ 11న ఈ పిటిషన్ దాఖలు చేశారు. టిక్ టాక్.. ఆత్మహత్యలు సహా చాలా నేరాలకు కారణమవుతుందని పిటిషన్లో పేర్కొన్నారు.
"అడ్డుఅదుపు లేని అశ్లీలతను వ్యాపిస్తూ దేశ యువతకు టిక్ టాక్ హాని చేస్తోంది. టిక్ టాక్ ద్వారా హింసను, రెండు మతాల మధ్య చిచ్చును పెట్టేందుకు ప్రయత్నించిన కొంతమందిపై ఈ ఏడాది జులైలో ముంబయి పోలీసులు రెండు కేసులు నమోదు చేశారు." - పిటిషనర్
పిటిషన్ ఈ వారంలో విచారణకు వచ్చే అవకాశం ఉంది. అయితే ఇదే తరహా వ్యాజ్యం గత ఏడాది మద్రాసు హైకోర్టులో దాఖలైంది. యాప్పై మొదట నిషేధం విధించిన కోర్టు.. మళ్లీ ఎత్తివేసింది.
- ఇదీ చూడండి: రాజ్యసభ రబ్బర్ స్టాంప్గా మారకూడదు: వెంకయ్య
