రాజస్థాన్ జోధ్పుర్కు చెందిన ఎనిమిదేళ్ల పూజ.. ఒలింపిక్స్ కోసం గత ఐదేళ్లుగా కఠోర సాధన చేస్తూ భారత క్రికెట్ జట్టు కెప్టెన్ విరాట్ కోహ్లీనే మెప్పించేసింది.
ఆమె లక్ష్యం ఒలింపిక్స్..
పూజ చదివేది మూడో తరగతే అయినా.. సిక్స్ప్యాక్ శరీరాకృతితో మహా మహా కండల వీరులనే ఆశ్చర్యపరుస్తోంది. మూడేళ్ల వయసు నుంచే శిక్షణ తీసుకుంటోంది. ఒలింపిక్స్లో స్వర్ణ పతకం సాధించాలన్న ఆశయంతోనే తన బాల్యాన్ని సాధనకే అంకితం చేసింది. ఇప్పుడు పరుగు పందెం సహా పలు క్రీడల్లో ఆరితేరిపోయింది.
పూజ కష్టం, దేశం కోసం గెలవాలన్న తపనను చూసి విరాట్ కోహ్లీ ఫౌండేషన్ సాయం చేసేందుకు ముందుకువచ్చింది. తన శిక్షణకు కావాల్సిన అన్ని ఖర్చులు భరిస్తూ స్కాలర్షిప్ ప్రకటించింది.
"అక్టోబర్ నెలలో విరాట్ కోహ్లీని కలిశాను. ఇలాగే కృషి చేస్తూ.. దేశం కోసం బంగారు పతకాన్ని గెలవాలని ఆయన చెప్పారు. నేను 2024 ఒలింపిక్స్లో స్వర్ణ పతకం సాధిస్తాను. నేను ఇప్పుడు మూడో తరగతి చదువుతున్నా. ప్రతి రోజూ ఉదయం 3 గంటల నుంచి 7 గంటల వరకు, సాయంత్రం 4 నుంచి 8 గంటల వరకు సాధన చేస్తాను. రన్నింగ్, వ్యాయామం, ఫుట్బాల్తో పాటు క్రికెట్లో ఫాస్ట్ బౌలింగ్ కూడా చేస్తాను. సిక్స్ప్యాక్ చేయాలని నేనెప్పుడూ అనుకోలేదు. మా మామయ్య చెప్పినట్టు నేను వ్యాయామం చేశాను అంతే.. సిక్స్ ప్యాక్ వచ్చేసింది."
-పూజ
పూజ ఇప్పుడు 12 నిమిషాల్లో 3 కి.మీ. పరుగు తీస్తుంది. మరో నాలుగేళ్లలో కఠోర సాధన చేయించి 9 నిమిషాల్లో 3 కిలోమీటర్లు పరిగెత్తేలా తీర్చిదిద్ది ఒలింపిక్స్కు పంపిస్తానంటున్నాడు పూజ మామయ్య.
"ఒలింపిక్స్లో సర్ణం సాధించాలన్న నా కలను నెరవేర్చుకోలేకపోయాను. కానీ, పూజలో ఆ నైపుణ్యం ఉంది. పట్టుదల ఉంది. తను సాధన ప్రారంభించి ఐదేళ్లయింది. తన స్థాయికి సరిపడా బాలలు భారతదేశంలోనే లేరు."
-పూజ మామయ్య
పూజకు పోషకాహారం, టోర్నమెంట్స్ ఆడేందుకు వెళ్తే అక్కడి ఖర్చులను విరాట్ కోహ్లీ ఫౌండేషనే భరించనుంది.
