అమెరికా ప్రభుత్వంలో భారత సంతతి వ్యక్తిని కీలక పదవి వరించింది. చెన్నైకు చెందిన డాక్టర్ సేతురామన్ పంచనాథన్ను నేషనల్ సైన్స్ ఫౌండేషన్ (ఎన్ఎస్ఎఫ్) డైరెక్టర్గా నియమిస్తూ అధ్యక్షుడు ట్రంప్ ఉత్తర్వులు జారీ చేశారు. పంచనాథన్ అనుభవం, పరిశోధనలు, నిబద్ధతే ఆయనకు ఈ పదవిని తెచ్చిపెట్టాయని శ్వేతసౌధం వర్గాలు వెల్లడించాయి.
విద్య, పరిశోధనలు, వైద్య రంగాల అభివృద్ధి కోసం ఎన్ఎస్ఎఫ్ పనిచేస్తుంది. ప్రస్తుత డైరెక్టర్ ఫ్రాన్స్ కోర్డోవా ఆరేళ్ల పదవీకాలం డిసెంబర్తో ముగియనుండగా.. అనంతరం పంచనాథన్ బాధ్యతలు స్వీకరించనున్నారు.
పంచనాథన్ గురించి..
1981లో మద్రాస్ విశ్వవిద్యాలయం నుంచి భౌతికశాస్త్రంలో డిగ్రీ పట్టా పొందారు పంచనాథన్. 1984లో బెంగళూరులో ఈసీఈ పూర్తి చేశారు. 1986లో మద్రాస్ ఐఐటీలో ఎలక్ట్రికల్ ఇంజినీరింగ్లో మాస్టర్స్ పట్టా పొందారు. 1989లో కెనడాలోని ఒట్టావా విశ్వవిద్యాలయంలో ఎలక్ట్రికల్ అండ్ కంప్యూటర్ ఇంజినీరింగ్ లో పీహెచ్డీ పూర్తి చేశారు.
ప్రస్తుతం పంచనాథన్ అరిజోనా స్టేట్ యూనివర్సిటీ (ఏఎస్యూ) పరిశోధన విభాగం అధిపతిగా, కార్యనిర్వాహక ఉపాధ్యక్షుడిగా ఉన్నారు. నేషనల్ సైన్స్ బోర్డ్, నేషనల్ అడ్వయిజరీ కౌన్సిల్ తదితర విభాగాల్లో వివిధ హోదాల్లో పనిచేసిన అనుభవం ఉంది.
