'ప్రైవేటు సంస్థల్లో ఆధార్ ధ్రువీకరణ చట్టబద్ధమేనా?'

ప్రైవేటు సంస్థల్లో వ్యక్తిగత ధ్రువీకరణకు ఆధార్​ను సమర్పించడంలో రాజ్యాంగబద్ధతపై జవాబివ్వాలంటూ కేంద్రానికి నోటీసులు జారీ చేసింది సుప్రీంకోర్టు. తాజా చట్ట సవరణ సుప్రీం తీర్పును ఉల్లంఘించేలా ఉందంటూ దాఖలైన ప్రజా ప్రయోజన వ్యాజ్యంపై విచారణ చేపట్టింది న్యాయస్థానం. ఈ కేసును ఇప్పటికే పెండింగ్​లో ఉన్న మరో కేసుతో కలిపి విచారిస్తామని వెల్లడించింది.

ఆధార్​ చట్టం 2019 లోని ప్రైవేటు సంస్థల క్లాజు రాజ్యాంగ బద్ధతపై జవాబివ్వాలంటూ కేంద్ర ప్రభుత్వానికి నోటీసులు జారీ చేసింది సుప్రీం కోర్టు. వ్యక్తిగత ధ్రువీకరణ కోసం వినియోగదారులు ప్రైవేటు సంస్థలకు స్వచ్ఛందంగా ఆధార్​ను సమర్పించడాన్ని ప్రశ్నిస్తూ దాఖలైన పిటిషన్​కు సమాధానమివ్వాలని ఆదేశించింది.

ఆధార్​పై సుప్రీంకోర్టు గత తీర్పును ఉల్లంఘించేలా తాజా చట్ట సవరణ ఉందంటూ ఎస్​జీ ఓంబత్కెరే అనే వ్యక్తి పిటిషన్ దాఖలు చేశారు. ఈ వ్యాజ్యంపై ప్రధాన న్యాయమూర్తి జస్టిస్​ ఎస్​ఏ బోబ్డే, జస్టిస్ బీఆర్ గవాయిల ధర్మాసనం విచారణ చేపట్టింది. ఈ ప్రజాప్రయోజన వ్యాజ్యాన్ని... పెండింగ్​లో ఉన్న ఆధార్​ కేసుతో కలిపి విచారించాలని నిర్ణయించింది.

ఆధార్ ప్రామాణికమే: నాటి తీర్పు

ఆధార్ ప్రామాణికతను సమర్థిస్తూ గతంలో ఐదుగురు సభ్యుల రాజ్యాంగ ధర్మాసనం తీర్పు ఇచ్చింది. అయితే స్వచ్ఛందంగానైనా వినియోగదారుని వద్ద నుంచి ప్రైవేటు సంస్థలు ధ్రువీకరణ పత్రంగా ఆధార్​ను తీసుకోకూడదని స్పష్టం చేసింది.

అయితే... బ్యాంకు ఖాతాలు, మొబైల్ ఫోన్ కనెక్షన్లు తీసుకునేందుకు ఆధార్​ను ధ్రువీకరణగా సమర్పించవచ్చంటూ కేంద్రం ఇటీవలే చట్టాన్ని సవరించింది.

ఇదీ చూడండి: పరిహారం కోసం 'సజీవ సమాధి'తో రైతుల నిరసన