కశ్మీర్​ ఆంక్షల గుప్పెట్లో లేదు: సుప్రీంకు కేంద్రం వివరణ

కశ్మీర్​లో ఆంక్షలను సడలించామని, బలగాల గుప్పెట్లో ఆ ప్రాంతం లేదని సుప్రీం కోర్టుకు కేంద్రం నివేదించింది. ఆర్టికల్​ 370 రద్దు తర్వాత విధించిన ఆంక్షలను సవాల్​ చేస్తూ దాఖలైన పిటిషన్లపై విచారణ సమయంలో కేంద్రం ఈ వివరాలు సమర్పించింది.

కశ్మీర్​ బలగాల గుప్పెట్లో లేదని, ఒక్కొక్కటిగా ఆంక్షలను సడలిస్తున్నామని సుప్రీం కోర్టుకు కేంద్రం నివేదించింది. ప్రభుత్వం తరఫున సొలిసిటర్​ జనరల్​ తుషార్​ మెహతా సర్వోన్నత న్యాయస్థానానికి కశ్మీర్​ పరిస్థితులపై నివేదిక సమర్పించారు. కశ్మీర్​లో ఆంక్షలను సవాల్​ చేస్తూ దాఖలైన పిటిషన్లపై సుప్రీంకోర్టు ఈరోజు వాదనలు ఆలకించింది.

"కశ్మీర్​లో ఆగస్టు 13 నుంచి ఆంక్షలు సడలిస్తున్నాం. పిటిషనర్లు పేర్కొన్నట్లు కశ్మీర్​ ఆంక్షల నీడలో లేదు. సీనియర్​ కాంగ్రెస్​ నేత గులాం నబీ అజాద్​ వేసిన పిటిషన్​లో పేర్కొన్న విషయాలు అవాస్తవం, అసంబద్ధం."
- కేంద్రం

అధికారులు పోస్ట్​పెయిడ్​ మొబైల్​ సర్వీసులను అక్టోబర్​ 14 నుంచి పునరుద్ధరించినట్లు తెలిపారు మెహతా. పాఠశాలలు తిరిగి ప్రారంభమయ్యాయని.. 970 పాఠశాలలు ఆర్టికల్​ 370 రద్దు తర్వాత యథావిధిగా నడిచాయన్నారు.

అంతకుముందు...

ఆర్టికల్‌ 370 రద్దు తర్వాత జమ్ముకశ్మీర్‌లో విధించిన ఆంక్షలపై లేవనెత్తే ప్రతి ప్రశ్నకూ సమాధానం ఇవ్వాలని ఆ రాష్ట్ర ప్రభుత్వ యంత్రాంగానికి సుప్రీం కోర్టు స్పష్టం చేసింది.