ఆర్సీఈపీ ఒప్పందంపై భారత్ సంతకం చేస్తే రైతులు, దుకాణదారులు నష్టపోతారని, చిన్న, మధ్యతరహా వ్యాపార సంస్థలకు కష్టాలు ఎదురవుతాయని కాంగ్రెస్ అధ్యక్షురాలు సోనియాగాంధీ అభిప్రాయపడ్డారు. ప్రాంతీయ సమగ్ర ఆర్థిక భాగస్వామ్య కూటమి (ఆర్సీఈపీ) ఒప్పందంలో భారత్ భాగస్వామి అవుతుందన్న వార్తల నేపథ్యంలో సోనియాగాంధీ కీలక వ్యాఖ్యలు చేశారు.
దిల్లీలోని ఐఏసీసీ ప్రధాన కార్యాలయంలో జరిగిన సమావేశంలో పాల్గొన్నారు సోనియా. దేశం ఆర్థిక మందగమనంలో ఉన్న నేపథ్యంలో ఆర్సీఈపీ ఒప్పందంలో భాగస్వామి కావడం భారత్కు చాలా నష్టం చేకూరుస్తుందని పేర్కొన్నారు.
"దేశ ఆర్థికవ్యవస్థ తీవ్ర మందగమనంలో ఉంది. ఈ సమస్యను గుర్తించి పరిష్కరించే ప్రయత్నం కేంద్రప్రభుత్వం చేయాలి. అయితే ప్రధాని మోదీ.. వార్తలో నిలిచే కార్యక్రమాలతో తీరిక లేకుండా ఉన్నారు. ఒక పౌరురాలిగా దేశ పరిస్థితి చూస్తుంటే నాకు చాలా బాధగా ఉంది. ఇంత కంటే ఆందోళనకర విషయం ఏంటంటే సమస్యపై ప్రభుత్వం పూర్తి నిర్లక్ష్యంగా ఉండటం." - సోనియాగాంధీ, కాంగ్రెస్ అధ్యక్షురాలు
భాజపా- గూఢచర్యం..
కాంగ్రెస్ పార్టీ ప్రధాన కార్యదర్శులు, రాష్ట్ర ఇన్ఛార్జ్లు, కాంగ్రెస్ అనుబంధ సంస్థల అధిపతులతో సమావేశం అయ్యారు సోనియాగాంధీ. మోదీ ప్రభుత్వం విపక్షాలపై గుఢచర్యానికి పాల్పడుతోందని ఆరోపించారు.
"మోదీ ప్రభుత్వం ఇజ్రాయిల్ పెగసాస్ సాఫ్ట్వేర్ను స్వాధీనం చేసుకుంది. దీని సహాయంతో సామాజిక కార్యకర్తలు, పాత్రికేయులు, రాజకీయ నాయకులపై గూఢచర్యానికి పాల్పడుతోంది. ఈ చర్య చట్ట విరుద్ధం, రాజ్యాంగ విరుద్ధమే కాదు సిగ్గుచేటు కూడా."- సోనియా గాంధీ, కాంగ్రెస్ అధ్యక్షురాలు
భాజపా ప్రభుత్వం ఉద్యోగాలు సృష్టించడానికి బదులు అనాలోచితంగా నోట్లరద్దు, జీఎస్టీ వంటి తప్పుడు ఆర్థిక నిర్ణయాలు అమలుచేసిందని సోనియా విమర్శించారు. ఫలితంగా దేశంలో గత 6 సంవత్సరాల్లో 90 లక్షల ఉద్యోగాలు ఊడిపోయాయని ఆమె పేర్కొన్నారు.
ఇదీ చూడండి: 'సోషల్ మీడియాలో ఉగ్ర చర్యలపై భారత్ ఆందోళన'
