బంగాల్ ముఖ్యమంత్రి మమత బెనర్జీ.. కోల్కతా పర్యటనకు వస్తున్న ప్రధాని నరేంద్ర మోదీతో ఇవాళ భేటీ కానున్నారని ఆ రాష్ట్ర సచివాలయ అధికారి తెలిపారు. షెడ్యూల్ ప్రకారం, శనివారం సాయంత్రం 4 గంటలకు ప్రధాని.. నగరానికి చేరుకున్న వెంటనే ఇరువురు నేతలు రాజభవన్లో సమావేశమవుతారని ఆయన స్పష్టం చేశారు.
అజెండా ఏమిటి?
ప్రధాని మోదీ, బంగాల్ సీఎం మమత బెనర్జీల మధ్య జరగనున్న ఈ కీలక భేటీకి సంబంధించిన అజెండాను మాత్రం ఆ ఉన్నతాధికారి వెల్లడించలేదు.
పోర్టు వార్షికోత్సవంలో మోదీ, మమత
ప్రధాని మోదీ తన రెండు రోజుల కోల్కతా పర్యటనలో భాగంగా కోల్కతా పోర్ట్ ట్రస్ట్ 150వ వార్షికోత్సవంలో పాల్గొంటారు. ఈ కార్యక్రమానికి ముఖ్యమంత్రి హోదాలో మమత బెనర్జీ కూడా హాజరవుతారని ఓ తృణమూల్ కాంగ్రెస్ సీనియర్ నేత తెలిపారు.
ఇదీ చూడండి: 'ఉక్రెయిన్ ప్రమాదంపై సమగ్ర విచారణ జరగాలి'
