త్వరలో మహాకూటమి ప్రభుత్వం: ఫడణవీస్

త్వరలోనే మహాకూటమి ప్రభుత్వాన్ని ఏర్పాటు చేస్తామని ప్రకటించారు మహారాష్ట్ర ముఖ్యమంత్రి దేవేంద్ర ఫడణవీస్. 'ప్రత్యామ్నాయ మార్గాల్లో ప్రభుత్వం' అంటూ వచ్చే వార్తలన్నీ వదంతులేనని కొట్టిపారేశారు. ప్రత్యామ్నాయ కూటమి వార్తలు కేవలం వినోదానికేనని స్పష్టం చేశారు.

మహారాష్ట్రలో ప్రభుత్వ ఏర్పాటుపై ధీమా వ్యక్తం చేశారు ఆ రాష్ట్ర ముఖ్యమంత్రి దేవేంద్ర ఫడణవీస్. నేడు రెండోసారి శాసనసభా పక్షనేతగా ఎన్నికైన ఆయన.. మహాకూటమి నేతృత్వంలో త్వరలోనే ప్రభుత్వం ఏర్పాటు చేయనున్నట్లు చెప్పారు.

ఐదు సంవత్సరాల్లో చెరో రెండున్నరేళ్లు ముఖ్యమంత్రి పదవి చేపట్టాలని మిత్రపక్షం శివసేన పట్టుపడుతోన్న నేపథ్యంలో ఈ వ్యాఖ్యలు చేశారు ఫడణవీస్.

"మహారాష్ట్ర ఓటర్లు భాజపా-శివసేన సభ్యులుగా ఉన్న మహాకూటమికి పట్టంకట్టారు. ఈ నేపథ్యంలోనే మహాకూటమి త్వరలో ప్రభుత్వం ఏర్పాటు చేస్తుంది. ప్రత్యామ్నయ మార్గంలో ప్రభుత్వ ఏర్పాటుపై పలు వదంతులు వస్తున్నాయి. అవి వినోదం కోసం మాత్రమే పనికొస్తాయి."

-దేవేంద్ర ఫడణవీస్, మహారాష్ట్ర ముఖ్యమంత్రి

1995 అనంతర ఎన్నికల్లో ఏ పార్టీకీ 75 సీట్ల కంటే ఎక్కువ స్థానాలు రాలేదని గుర్తుచేశారు ఫడణవీస్. 288 సీట్లున్న అసెంబ్లీలో భాజపా 2014లో 122, తాజాగా 105 స్థానాలతో జనహృదయాన్ని గెలుచుకుందని వ్యాఖ్యానించారు.

ఇదీ చూడండి: మహా భాజపా శాసనసభాపక్ష నేతగా మరోసారి ఫడణవీస్