'మహా'సభలోకి మారిన సీన్: 'శాసనసభ్యుడినైన నేను...'

మహారాష్ట్ర శాసనసభ ప్రత్యేక సమావేశంలో ఎమ్మెల్యేలు ప్రమాణస్వీకారం చేశారు. సభకు వచ్చిన ఎమ్మెల్యేలను ఆహ్వానిస్తూ అసెంబ్లీ వద్ద సందడి చేశారు ఎన్​సీపీ నేత సుప్రియా సూలె. అదే సమయంలో గురువారం సీఎంగా ప్రమాణస్వీకారం చేయనున్న శివసేన నేత ఉద్ధవ్ ఠాక్రే... గవర్నర్​తో భేటీ అయ్యారు.

నిన్నటివరకు హోటళ్లు, పార్టీ కార్యాలయాలు కేంద్రంగా జరిగిన మహారాష్ట్ర రాజకీయం నేడు శాసనసభకు చేరుకుంది. కొత్తగా ఎన్నికైన వారితో శాసనసభ్యులుగా ప్రమాణస్వీకారం చేయించారు ప్రొటెం స్పీకర్ కాళిదాస్ కొలంబ్కర్. తొలుత... ఎమ్మెల్యేలు బాబన్​రావ్ పచ్పుటే, విజయ్​కుమార్ గవిట్, రాధాకృష్ణ విఖే పాటిల్​ను ప్రిసైడింగ్ అధికారులుగా ప్రకటించారు ప్రొటెం స్పీకర్.

అనంతరం దేవేంద్ర ఫడణవీస్ ప్రమాణస్వీకారం చేశారు. తర్వాత ఎన్​సీపీకి చెందిన అజిత్ పవార్, దిలీప్ వాల్సే పాటిల్, ఛగన్ భుజ్​బల్, కాంగ్రెస్ నేతలు అశోక్ చవాన్, పృథ్వీరాజ్, భాజపా నేత హరిభావ్ భగాడే ప్రమాణ చేశారు.

'అన్నచెల్లెలి అనుబంధం'

మహారాష్ట్ర శాసససభ ప్రత్యేక సమావేశం సందర్భంగా ఎన్నికైన శాసనసభ్యులను ఆహ్వానిస్తూ ప్రవేశద్వారం వద్ద నిల్చున్నారు ఎన్​సీపీ నేత, శరద్​ పవార్ కుమార్తె సుప్రియా సూలె. ఇంతలో శాసనసభలోకి వెళ్లేందుకు అక్కడికి చేరుకున్నారు అజిత్ పవార్. తిరుబాటు యత్నం విఫలమై పవార్​తో రాజీ పడిన సోదరుడు అజిత్​ను ఆత్మీయంగా ఆలింగనం చేసుకున్నారు సుప్రియ.

'అన్నచెల్లెలి అనుబంధం'-అజిత్​తో సుప్రియ

అనంతరం అక్కడికి వచ్చిన ఆపద్ధర్మ ముఖ్యమంత్రి దేవేంద్ర ఫడణవీస్​తోనూ కరచాలనం చేశారు సూలె. కాసేపు ఆయనతో ముచ్చటించారు.

దేవేంద్ర ఫడణవీస్​తో సుప్రియ కరచాలనం

'పార్టీతోనే నా ప్రయాణం'

తన రాజకీయ ప్రస్థానం ఎన్​సీపీతోనే అని స్పష్టం చేశారు అజిత్​ పవార్.

"ప్రస్తుతం నేను చెప్పేదేమీ లేదు. సరైన సమయం వచ్చినప్పుడు మాట్లాడతా. నేను ఇంతకుముందే చెప్పాను. నేను ఎన్​సీపీలోనే ఉన్నాను. ఉంటాను కూడా. ఇందులో గందరగోళం సృష్టించేందుకు ఏమీ లేదు."

-అజిత్​ పవార్, ఎన్​సీపీ నేత

యువ ఠాక్రేకు శుభాకాంక్షల వెల్లువ

తొలిసారి శాసనసభ్యుడిగా ఎన్నికైన ఆదిత్య ఠాక్రేకు సీనియర్ సభ్యులు శుభాకాంక్షలు తెలిపారు. శాసనసభకు చేరుకున్న ఆదిత్యకు ఆత్మీయ ఆలింగనంతో స్వాగతం పలికారు సుప్రియా సూలె. శాసనసభలో యువఠాక్రేను అభినందిస్తూ శివసేన, ఎన్​సీపీకి చెందిన నేతలు చుట్టుముట్టారు.

ముఖ్యమంత్రి లేకుండానే

మహారాష్ట్ర 14వ శాసనసభ సభ్యుల ప్రమాణస్వీకారం ముఖ్యమంత్రి లేకుండానే సాగింది. గత రెండు దశాబ్దాలుగా సీఎం ముందుగా ప్రమాణస్వీకారం చేసే సంప్రదాయం ఉందని, అయితే ఈసారి ఆ పద్ధతి పాటించలేకపోయామని అసెంబ్లీ కార్యదర్శి రాజేంద్ర భగవత్ చెప్పారు.

గవర్నర్​తో ఉద్ధవ్ భేటీ..

మహారాష్ట్ర సీఎంగా ప్రమాణస్వీకారం చేయనున్న శివసేన అధ్యక్షుడు ఉద్ధవ్ ఠాక్రే సతీ సమేతంగా గవర్నర్ భగత్​సింగ్ కోశ్యారీని కలిశారు. ముఖ్యమంత్రిగా గురువారం ప్రమాణస్వీకారం చేయనున్న నేపథ్యంలో మర్యాదపూర్వకంగా భేటీ అయ్యారు.

గవర్నర్​తో ఉద్ధవ్

ఇదీ చూడండి: చిదంబరం కోసం తిహార్​కు రాహుల్​, ప్రియాంక