భారత అంతరిక్ష పరిశోధన కేంద్రం-ఇస్రో చరిత్రలో మరపురాని ఏడాదిగా 2019 మిగిలిపోనుంది. ఈ ఏడాదిలో ఇస్రో మొత్తం ఏడు ఉపగ్రహాలను ప్రయోగించగా.. అందులో దాదాపు ప్రతిదీ విజయవంతమైంది. చంద్రయాన్-2 కూడా 98శాతం అనుకున్న లక్ష్యాలను ఛేదించింది. ఈ తరుణంలో జనవరిలో నింగిలోకి దూసుకెళ్లిన 'మైక్రోశాట్-ఆర్' నుంచి మొన్నటి 'రీశాట్-2బీఆర్1' వరకు ఇస్రో ప్రయోగించిన ఉపగ్రహాలు, వాటి ప్రయోజనాలు, ఫలితాలపై ఓ లుక్కేద్దాం..
1. మైక్రోశాట్-ఆర్
ప్రయోజనం : ఇమేజ్ సెన్సింగ్ ఉపగ్రహమైన మైక్రోశాట్-ఆర్.. దేశ రక్షణ రంగ సంస్థ డీఆర్‌డీవోకు సహకరిస్తుంది. దీనితో పాటు తమిళనాడు ఉన్నత పాఠశాల విద్యార్థులు రూపొందించిన కమ్యూనికేషన్ శాటిలైట్(కలాంశాట్)ను కూడా ప్రయోగించారు.
శాటిలైట్ వాహకం : పోలార్‌ శాటిలైట్ లాంచ్‌ వెహికల్‌ - సీ44
ఎప్పుడు : 2019 జనవరి 24, రాత్రి 11.37 గంటలకు
ఎక్కడ : నెల్లూరు జిల్లా శ్రీహరికోటలోని సతీశ్ ధవన్ అంతరిక్ష ప్రయోగ కేంద్రం-షార్
2. జీశాట్-31
ప్రయోజనం : మొబైల్ నెట్వర్క్, ఏటీఎం, వీశాట్‌ నెట్‌వర్క్స్‌, టెలివిజన్‌ అప్‌లింక్స్‌, డిజిటల్‌ శాటిలైట్, డీటీహెచ్‌ టెలివిజన్‌, సెల్యులార్‌ బ్యాకప్‌ తదితర కమ్యూనికేషన్ సేవలను మరింత మెరుగుపరుస్తుంది. 15 ఏళ్ల పాటు నిరాటంకంగా సేవలందించగలదు.
శాటిలైట్ వాహకం : ఏరియానా స్పేస్‌ రాకెట్
ఎప్పుడు : 2019 ఫిబ్రవరి 6, తెల్లవారుజామున 2.31 గంటలకు
ఎక్కడ : ఫ్రెంచ్‌ గయానాలోని కౌరు లాంచ్‌ కాంప్లెక్స్‌
3. ఇమీశాట్
ప్రయోజనం : శత్రుదేశాల రాడార్లను సులువుగా పసిగట్టగలదు. అలాగే మన కదలికలను గుర్తుపట్టకుండా శత్రు శిబిరాల్లో కమ్యూనికేషన్ సౌకర్యాలు నెలకొల్పేందుకు ఉపకరిస్తుంది. ఇమీశాట్ సాయంతో చొరబాటుదారులను సులువుగా గుర్తించొచ్చు.
శాటిలైట్ వాహకం : పోలార్‌ శాటిలైట్ లాంచ్‌ వెహికల్‌ - సీ45
ఎప్పుడు : 2019 ఏప్రిల్ 1
ఎక్కడ : నెల్లూరు జిల్లా శ్రీహరికోటలోని సతీశ్ ధవన్ అంతరిక్ష ప్రయోగ కేంద్రం-షార్
4. రీశాట్-2బీ
ప్రయోజనం : భూ పరిశీలనకు ఉపయోగపడుతుంది, ఈ ఉపగ్రహం ఐదేళ్ల పాటు నిరాటంకంగా సేవలందిస్తుంది.
శాటిలైట్ వాహకం : పోలార్‌ శాటిలైట్ లాంచ్‌ వెహికల్‌ - సీ46
ఎప్పుడు : మే 22, 2019
ఎక్కడ : నెల్లూరు జిల్లా శ్రీహరికోటలోని సతీశ్ ధవన్ అంతరిక్ష ప్రయోగ కేంద్రం-షార్
5. చంద్రయాన్-2
కోట్లాది భారతీయులు గర్వపడేలా అమెరికా, రష్యాలకు సైతం సాధ్యం కాని ప్రయోగానికి 2019 జులై 22న శ్రీకారం చుట్టింది ఇస్రో. జీఎస్‌ఎల్‌వీ-మార్క్‌3ఎం1 వాహకనౌక ద్వారా చంద్రుడి దక్షిణ ధ్రువంపై మొట్టమొదటి సారి కాలు మోపేందుకు చంద్రయాన్-2 నింగిలోకి దూసుకెళ్లింది. అయితే చివరి నిమిషంలో విక్రమ్ ల్యాండర్తో సంబంధాలు తెగిపోయాయి. అయినప్పటికీ చంద్రయాన్-2 ద్వారా 98శాతం విజయం సాధించామని శాస్త్రవేత్తలు ప్రకటించారు.
6. కార్టోశాట్-3
ప్రయోజనం : ప్రపంచ చరిత్రలోనే అత్యంత రిజల్యూషన్‌తో భూమి ఛాయా చిత్రాలను తీసే శక్తిమంతమైన ఉపగ్రహం. అలాగే శత్రువుల కదలికలు, స్థావరాలపై నిఘాను మరింత పటిష్ఠం చేసేందుకు దోహదపడుతుంది.
శాటిలైట్ వాహకం : పీఎస్ఎల్వీ సీ-47 ద్వారా ప్రయోగించారు.
ఎప్పుడు : 2019 నవంబరు 27
ఎక్కడ : నెల్లూరు జిల్లా శ్రీహరికోటలోని సతీశ్ ధవన్ అంతరిక్ష ప్రయోగ కేంద్రం-షార్
7. రీశాట్-2బీఆర్1
ప్రయోజనం : ఎక్స్‌-బ్యాండ్‌ రాడార్‌ 8 నుంచి 12 గిగాహెర్ట్జ్ పౌనఃపున్యాల మధ్య ఉండే తరంగాలను పరిశీలిస్తుంది. ప్రతికూల వాతావరణ పరిస్థితుల్లోనూ పనిచేసే ఈ ఉపగ్రహం జాతీయ రక్షణ, పౌర, వ్యవసాయ, అటవీ, విపత్తు నిర్వహణ రంగాల్లో సేవలందించనుంది.
శాటిలైట్ వాహకం : పీఎస్ఎల్వీ-సీ48 (పీఎస్ఎల్వీ క్యూఎల్ తరహా రాకెట్)
ఎప్పుడు : 2019 డిసెంబరు 11, మధ్యాహ్నం 3.25 గంటలకు
ఎక్కడ : నెల్లూరు జిల్లా శ్రీహరికోటలోని సతీశ్ ధవన్ అంతరిక్ష ప్రయోగ కేంద్రం-షార్
