దేశంలోనే తొలి ట్రాన్స్​జెండర్​ అటవీ అధికారిగా దీప్తి!

ఏదో సాధించాలన్న తపనతో ప్రభుత్వ ఉద్యోగాలు సంపాదించి, అభివృద్ధి వైపు వడివడిగా అడుగులు వేస్తున్నారు ట్రాన్స్​జెండర్లు. తాము భిక్షాటనకు మాత్రమే పరిమితమయ్యేందుకు అదేం వృత్తి కాదని ఎలుగెత్తి చాటుతున్నారు. తాజాగా తమిళనాడులోని దీప్తి.. దేశంలోనే తొలి అటవీ శాఖ అధికారిగా ఉద్యోగం పొంది తనలాంటి వారికి ఆదర్శంగా నిలుస్తోంది.

పొట్ట కూటి కోసం.. ఎన్నో అవమానాలు భరించిన ట్రాన్స్​జెండర్లు తలుచుకుంటే ఏదైనా సాధిస్తామని నిరూపిస్తున్నారు. భిక్షాటన వదిలి విద్యా, ఉద్యోగాల్లో అర్హత సంపాదించి ఆదర్శంగా నిలుస్తున్నారు. ఈ స్ఫూర్తితోనే.. దేశంలోనే తొలి ట్రాన్స్​జెండర్​ అటవీ అధికారిగా నియమితురాలైంది తమిళనాడుకు చెందిన దీప్తి.

కుమారుడు కూతురిగా ఎదిగితే..

సుబ్రమణికి కుమారుడిగా జన్మించిన సుతన్​రాజ్ తరువాత​ దీప్తిగా పేరు మార్చుకుంది. దీప్తి తండ్రి 2007లో ఓ రోడ్డు ప్రమాదంలో మరణించారు. నీలగిరి అటవీ శాఖలో ఉద్యోగం చేసిన తన తండ్రి స్థానంలో తనకు ఉద్యోగం ఇవ్వాలని దరఖాస్తు చేసుకుంది. ఐదేళ్లుగా ఎంతో ప్రయత్నించింది.

బీకామ్​లో డిగ్రీ పూర్తి చేసిన దీప్తి.. ప్రభుత్వ ఉద్యోగం పొందాలని నిరంతరం కష్టపడేది. ఇన్నేళ్లకు ​తన కష్టం ఫలించింది. ఎట్టకేలకు తండ్రి స్థానంలో ఉద్యోగంలో చేరాలని తమిళనాడు ప్రభుత్వం తనకు నియామక పత్రం పంపింది.

ఇదీ చదవండి:దేశంలో తొలి ట్రాన్స్​జెండర్​ నర్స్​గా అన్బూ రూబీ

ఇదీ చదవండి:'ఉన్నావ్​ బాధితురాలి కుటుంబానికి సరైన న్యాయం చేస్తాం'