అయోధ్య కేసులో సుప్రీంతీర్పుపై ఐక్యరాజ్యసమితి మానవ హక్కుల కమిషన్ ఎదుట దాయాది పాకిస్థాన్ ఆరోపణల్ని దీటుగా తిప్పికొట్టింది భారత్. తమకు స్వార్థపూరిత, తప్పుడు సమాచారాన్ని ప్రచారం చేయడం కంటే భారత్లోని మైనారిటీలను విద్య సహా వివిధ రంగాల్లో సాధికారుల్ని చేయడమే ప్రాధాన్యాంశమని స్పష్టంచేసింది.
మైనారిటీ వ్యవహారాల వేదిక 12వ సదస్సులో పాక్ ఈ ఆరోపణలు చేయగా... భారత్ సమాధానమిచ్చింది. భారత దేశ ప్రతినిధిగా దౌత్యాధికారి విమర్శ్ ఆర్యన్ హాజరయ్యారు. పాక్లో మత, నైతిక, వర్గ, భాషాపరమైన మైనారిటీల ప్రాథమిక హక్కులకు భంగం కలుగుతోందని ఆర్యన్ ఆరోపించారు.
"భారత్ పటిష్ఠ ప్రజాస్వామ్యదేశం. మైనారిటీ పౌరుల హక్కులను సమర్థ రాజ్యాంగ యంత్రాంగం కాపాడుతోంది. పాకిస్థాన్లో అమలులో ఉన్న దైవదూషణ చట్టాల కారణంగా మత, జాతి, వర్గ, భాషాపరమైన మైనారిటీల హక్కులు అణచివేతకు గురవుతున్నాయి."
-విమర్శ్ ఆర్యన్, భారత ప్రతినిధి
పౌరులు వాస్తవిక ప్రజాస్వామ్యాన్ని అనుభవించని దేశం నుంచి ప్రపంచం మానవ హక్కుల గురించి నేర్చుకునేది ఏమీ లేదని ఆర్యన్ పాక్ను ఉద్దేశించి వ్యాఖ్యానించారు.
"ఈ సదస్సు అత్యంత సున్నితమైన మైనారిటీల మానవ హక్కులకు సంబంధించినది. అయితే అజెండాపై మాట్లాడకుండా తప్పుడు ప్రచారం, నిరాధార ఆరోపణలు చేస్తోంది పాక్. దాయాదివి కేవలం వక్రీకరణలు మాత్రమే."
-భారత ప్రతినిధి ఆర్యన్
ఇదీ చూడండి: కసబ్కు శిక్షపడేలా చేసిన ధీర బాలిక.. దీన గాథ
