మోదీతో దీదీ భేటీ.. పౌర చట్టం ఉపసంహరణకు విజ్ఞప్తి

బంగాల్​లో పర్యటనకు వెళ్లిన ప్రధాని మోదీతో సమావేశమయ్యారు ముఖ్యమంత్రి మమతా బెనర్జీ. పౌరచట్టం, ఎన్​ఆర్​సీ, ఎన్​పీఆర్​లను ఉపసంహరించాలని కోరినట్లు వెల్లడించారు. సమావేశం అనంతరం ప్రధాని భేటీ వివరాలు తెలిపిన దీదీ కాసేపటికే ధర్నాలో కూర్చుని అందరినీ ఆశ్చర్యపరిచారు.

ప్రధానమంత్రి నరేంద్రమోదీతో బంగాల్ ముఖ్యమంత్రి మమత బెనర్జీ భేటీ అయ్యారు. ఈ సందర్భంగా పౌరచట్టం, ఎన్​ఆర్​సీలను వెనక్కి తీసుకోవాలని ప్రధానిని కోరినట్లు వెల్లడించారు దీదీ.

కోల్​కతా పోర్ట్​ ట్రస్ట్​ 150వ వార్షికోత్సవంలో పాల్గొనేందుకు రెండు రోజుల పర్యటనకు వెళ్లిన మోదీ.. బంగాల్ రాజ్​భవన్ వేదికగా మమతతో సమావేశమయ్యారు. పలు అంశాలపై ప్రధాని, ముఖ్యమంత్రుల మధ్య చర్చ జరిగింది. సమావేశం అనంతరం వివిధ కార్యక్రమాలకు ఆర్థిక సహకారాన్ని కోరేందుకే ప్రధానితో భేటీ అయినట్లు వివరించారు దీదీ.

"ప్రధానితో మర్యాదపూర్వకంగా భేటీ అయ్యాను. రాష్ట్రానికి రావలసిన రూ.28 కోట్ల అంశాన్ని మోదీకి నివేదించాను. పౌరచట్ట సవరణ, ఎన్​ఆర్​సీ, ఎన్​పీఆర్​లపై దేశవ్యాప్తంగా నిరసనలు కొనసాగుతాయని తెలిపాను. మేం పై మూడు అంశాలకు వ్యతిరేకమని వివరించాను. కేంద్రం పునరాలోచించి పౌరచట్టాన్ని వెనక్కి తీసుకోవాలని కోరాను."

-మమత బెనర్జీ, బంగాల్ ముఖ్యమంత్రి

దీదీ మార్క్ ధర్నా

మోదీతో సమావేశమైన కాసేపటికే అందరినీ ఆశ్చర్యపరిచారు దీదీ. పౌరచట్టం, ఎన్​ఆర్​సీపై ఆందోళనకు దిగారు. తృణమూల్ కాంగ్రెస్ విద్యార్థి విభాగం చేస్తున్న ధర్నాలో కూర్చున్నారు.

ఇదీ చూడండి: 'పాక్ దుశ్చర్యలపై మౌనమెందుకు మోదీజీ..?'