లోక్సభలో కాంగ్రెస్ సభ్యుల వ్యవహార శైలిపై స్పీకర్ ఓం బిర్లా అసంతృప్తి వ్యక్తం చేశారు. భాజపా ప్రభుత్వ ఏర్పాటును వ్యతిరేకిస్తూ వెల్లోకి దూసుకురావటం ఆమోదయోగ్యం కాదన్నారు.
"ఈ రోజు పార్లమెంటులో జరిగిన ఘటన నన్ను చాలా బాధించింది. ఇది ఆమోదయోగ్యం కాదు. ఈ చర్యను సహనం వహించేది లేదు. సభలో గందరగోళం కారణంగా నేను మొదటిసారి వాయిదా వేయాల్సి వచ్చింది. సభ సజావుగా జరగాలి. వాయిదా పడకూడదు."
-ఓం బిర్లా, లోక్సభ స్పీకర్
అసలేం జరిగింది..?
మహారాష్ట్ర పరిణామాలపై ఉభయ సభల్లో కాంగ్రెస్ సహా విపక్షాలు నిరసన చేపట్టాయి. లోక్సభలో కాంగ్రెస్ ఎంపీలు హిబీ ఈదెన్, టీఎన్ ప్రతాపన్ వెల్లోకి దూసుకొచ్చారు. ప్రజాస్వామ్యం ఖూనీ అని పెద్ద బ్యానర్లు ప్రదర్శిస్తూ నినాదాలు చేశారు.
వీరిద్దరి చర్యలపై ఆగ్రహం వ్యక్తం చేసిన స్పీకర్.. వారిని బయటకు పంపాలని మార్షల్స్ను ఆదేశించారు. ఎంపీలను బయటికి పంపేందుకు ప్రయత్నించిన మార్షల్స్ను కాంగ్రెస్ సభ్యులు అడ్డుకోవటం వల్ల సభలో గందరగోళం నెలకొంది. ఈ పరిస్థితిలో సభను వాయిదా వేశారు స్పీకర్.
ఐదేళ్లపాటు సస్పెన్షన్!
వెల్లోకి దూసుకొచ్చి దూకుడుగా ప్రవర్తించిన ఎంపీలు ఈదెన్, ప్రతాపన్ను 5 ఏళ్ల పాటు సస్పెండ్ చేసే అవకాశం ఉందని విశ్వసనీయ వర్గాల సమాచారం. సభలో జరిగిన విషయంపై క్షమాపణలు చెప్పేందుకు ఎంపీలు నిరాకరించడాన్ని స్పీకర్ తీవ్రంగా పరిగణిస్తున్నారని ఆయా వర్గాలు తెలిపాయి.
ఇదీ చూడండి: భాజపా, శివసేన మోసం చేశాయని కోర్టుకెక్కిన ఓటరు
