'రాత్రంతా కబడ్డీ.. ఒక్కరోజు సెలవు ఇవ్వండి సార్​'

రాత్రి పడుకోకుండా కబడ్డీ మ్యాచ్‌ చూడటం వల్ల బాగా అలసిపోయానని.. అందుకే ఒకరోజు సెలవు కావాలని తమిళనాడుకు చెందిన ఓ విద్యార్థి.. ఉపాధ్యాయుడికి లేఖ రాశాడు. సెలవు కోసం అసత్యాలు చెప్పకుండా నిజాయితీగా కారణం చెప్పడం వల్ల ఈ ఉత్తరం సామాజిక మాధ్యమాల్లో చక్కర్లు కొడుతోంది.

తమిళనాడులో ఓ విద్యార్థి సెలవు కోసం ఉపాధ్యాయుడికి రాసిన లేఖ సామాజిక మాధ్యమాల్లో వైరల్​గా మారింది. సెలవుకు కారణాన్ని లేఖలో నిజాయితీగా పేర్కొన్నందున ఆ ఉత్తరం సర్వత్రా చర్చనీయాంశమైంది. అదేంటి? ఎలా? అనుకుంటున్నారా అయితే.. ఈ స్టోరీ చదవండి.

దీపక్​ సెలవు లేఖ

తిరువరూర్​ జిల్లాలోని ఓ ప్రభుత్వ పాఠశాలలో 8వ తరగతి చదువుతున్న దీపక్.. పాఠశాల ఉపాధ్యాయుడికి సెలవు కోసం లేఖ రాశాడు. రాత్రంతా నిద్రపోకుండా కబడ్డీ మ్యాచ్ చూడటం వల్ల బాగా అలసిపోయానని, దయచేసి ఒక రోజు సెలవు ఇవ్వాలని కోరాడు​.

విద్యార్థి నిజాయితీకి ఆశ్చర్యపోయిన ఉపాధ్యాయుడు సెలవు ఇచ్చాడు. ఆ లేఖను ఫేస్‌బుక్‌లో పెట్టాడు. సెలవు చీటీని చూసిన నెటిజన్లు.. దీపక్‌ను ప్రశంసిస్తున్నారు. ఉత్తరంపై స్పందించిన దీపక్​.. తనకు అసత్యాలు చెప్పడం నచ్చదని, భవిష్యత్​లో ఐఏఎస్​ అధికారి కావడమే తన లక్ష్యమని తెలిపాడు.