1995 కేజీల కిచిడీని రూపొందించి హిమాచల్ ప్రదేశ్ గిన్నిస్ బుక్ ఆఫ్ వరల్డ్ రికార్డ్స్లో చోటు సంపాదించుకుంది. సంక్రాంతి వేడుకల్లో భాగంగా తట్టపాణి గ్రామంలో.. హాలీడే హోం హోటల్కు చెందినమొత్తం 25మంది చెఫ్లు కలిసి ఈ కిచిడీని తయారు చేశారు. దీనితో గత ఏడాది ప్రముఖ చెఫ్ సంజీవ్ కపూర్ తయారు చేసిన 918కేజీల కిచిడీ రికార్డు బద్దలైంది.
ఇంత మొత్తంలో కిచిడీని రూపొందించడానికి సుమారు 5 గంటల సమయం పట్టింది. ఈ కిచిడీ తయారీకీ 270కేజీల బరువు ఉన్న పాత్రను వినియోగించారు. తయారీ అనంతరం.. వడ్డించడం కోసం ఈ పాత్రను మోయడానికి ఓ భారీ క్రేన్ను ఉపయోగించాల్సి వచ్చింది.
రాష్ట్ర పర్యటక శాఖ, పౌర విమానయాన శాఖ సమక్షంలో గిన్నీస్ బుక్ రికార్డు సర్టిఫికేట్ను రాష్ట్ర ముఖ్యమంత్రి జయ్ రామ్ ఠాకూర్ అందుకున్నారు.
ప్రతిఏటా అన్నదానం
మకర సంక్రాంతి సందర్భంగా 1926 నుంచి తట్టపాణి గ్రామంలో సత్లెజ్ నదీ స్నానానికి వచ్చిన భక్తులకు అన్నదానం కార్యక్రమాన్ని సంప్రదాయంగా నిర్వహిస్తున్నారు. ప్రస్తుతం ఈ కార్యక్రమాన్ని దుర్గా దేవి బిహారీ లాల్ విరోచన్ లాల్ ట్రస్ట్ ఆధ్వర్యంలో నిర్వహిస్తున్నారు.
ఇదీ చూడండి : మధురైలోని అవనియాపురంలో జల్లికట్టు...ప్రత్యక్షప్రసారం
