సీడీఎస్​ నియామకం ఓ తప్పటడుగు: కాంగ్రెస్

సీడీఎస్​ నియామకం విషయంలో కేంద్రం తప్పటడుగులు వేస్తోందని కాంగ్రెస్ ఆరోపించింది. ఎన్నో అస్పష్టతల నడుమ త్రివిధ దళాల ప్రధానాధికారిని ఎంపిక చేసిందని విమర్శించింది. సీడీఎస్ పదవి ప్రాధాన్యం, విధులు తదితర అంశాలపై ట్విట్టర్​లో కేంద్రానికి ప్రశ్నలు సంధించారు కాంగ్రెస్ ఆధికార ప్రతినిధి మనీశ్ తివారీ.

సీడీఎస్​గా జనరల్​ బిపిన్​ రావత్​ నియామకంపై ప్రశ్నల వర్షం కురిపించింది కాంగ్రెస్. ఈ విషయంలో కేంద్రం తప్పటడుగు వేసిందని విమర్శించింది. ఈ పరిణామంతో అనేక సమస్యలు తలెత్తే ప్రమాదముందని హెచ్చరించింది.

ఎన్నో ఇబ్బందులు, అస్పష్టతల నడుమ సీడీఎస్​ను నియమించాల్సిన అవసరం ఏముందని ట్విట్టర్​ వేదికగా నిలదీశారు కాంగ్రెస్​ అధికార ప్రతినిధి మనీశ్​ తివారీ. సీడీఎస్​ నియామకంపై మరికొన్ని ప్రశ్నలు సంధించారు. అవి...

1. సీడీఎస్​ను రక్షణ మంత్రికి ప్రధాన సైనిక సలహాదారుగా వ్యవహరిస్తున్నారు. ప్రభుత్వానికి త్రివిధ దళాల అధిపతులు సలహాలు ఇచ్చే విషయంలో దీని ప్రభావం ఎలా ఉంటుంది? సంబంధిత దళాధిపతి ఇచ్చిన సిఫార్సుకన్నా సీడీఎస్​ సూచనకే ఎక్కువ విలువ ఉంటుందా?
2. త్రివిధ దళాల అధిపతులు ఇప్పుడు రక్షణ మంత్రికి... రక్షణ శాఖ కార్యదర్శి ద్వారా రిపోర్ట్​ చేయాలా లేక సీడీఎస్​ ద్వారానా?
3. రక్షణ మంత్రిత్వశాఖకు పరిపాలనా సారథిగా రక్షణ కార్యదర్శి కొనసాగుతారా? ప్రతిపాదిత సైనిక వ్యవహారాల శాఖ నిర్వర్తించాల్సిన బాధ్యతలు ఏంటి?
4. త్రివిధ దళాల పరిధిలోని సంస్థల విషయంలో సంబంధిత అధిపతులకన్నా సీడీఎస్​కే ఎక్కువ అధికారాలు ఉంటాయా?
5. పౌరులు-సైన్యం బంధంపై సీడీఎస్​ నియామకం ప్రభావం ఎలా ఉంటుంది? 1947 నుంచి పౌరులు-సైన్యం బంధం విషయంలో భారత్​ తిరుగులేని విజయం సాధించింది. ఇప్పుడు మనం తప్పుడు మార్గంలో వెళ్తున్నామా?