సిగరెట్ ఇవ్వలేదనే కోపంతో సోదరుడి ప్రాణం తీసిన ఘటన కర్ణాటకలో చోటుచేసుకుంది. మద్యం మత్తులో కోపం పెంచుకుని సిద్దప్పస్వామి (42) అనే వ్యక్తిపై కత్తితో దాడి చేసి హతమార్చాడు బాలస్వామి.
చామరాజనగర్లోని మధువనహల్లి గ్రామానికి చెందిన సిద్దప్పస్వామి, బాలస్వామి అన్నదమ్ముల కుమారులు. గురువారం సాయంత్రం బాలస్వామి ఫూటుగా మద్యం సేవించి ఇంటికి వచ్చాడు. సిద్దప్పస్వామిని సిగరెట్ ఇవ్వమని అడిగాడు. తన వద్ద లేదని అతను చెప్పడం వల్ల కోపోద్రిక్తుడై వాగ్వాదానికి దిగాడు బాలస్వామి. ఈ క్రమంలో ఇద్దరి మధ్య మాటా మాటా పెరిగి గొడవకు దారి తీసింది. ఆగ్రహంతో ఊగిపోయిన బాలస్వామి కత్తితో సిద్ధప్పస్వామిపై దాడి చేశాడు. చాతిలో కత్తిపోట్లు దిగడం వల్ల సిద్దప్పస్వామి ప్రాణాలు కోల్పోయాడు. అనంతరం బాలస్వామి అక్కడి నుంచి పరారయ్యాడు.
ఘటనాస్థలానికి చేరుకున్న పోలీసులు మృతదేహాన్ని శవపరీక్ష నిమిత్తం స్థానిక ప్రభుత్వ ఆసుపత్రికి తరలించారు. కేసు నమోదు చేసుకుని నిందితుడి కోసం గాలిస్తున్నారు.
ఇదీ చూడండి: బావిలో చిరుత.. ఎట్టకేలకు కాపాడిన అధికారులు
