చివరిదశ పోలింగ్కు ఝార్ఖండ్లో సర్వం సిద్ధమైంది. ఇప్పటి వరకు నాలుగు విడతలు పోలింగ్ జరగగా ఐదో విడతలో భాగంగా ఇవాళ 16 నియోజక వర్గాలకు ఎన్నికలు జరగనున్నాయి. మొత్తం 40,05,287 మంది ఓటర్లు.. రాజకీయ నేతల భవితవ్యాన్ని ఈవీఎంల్లో నిక్షిప్తం చేయనున్నారు. అన్ని నియోజకవర్గాల్లోనూ ఉదయం 7 గంటలకు పోలింగ్ ప్రారంభం కానుంది. బోరియో, బర్హెట్, లితిపార, మహేశ్పుర, శికారిపారలో మధ్యాహ్నం 3 గంటలకే పోలింగ్ ముగియనుంది. మిగతా ప్రాంతాల్లో మాత్రం సాయంత్రం 5 గంటల వరకు కొనసాగనుంది. ఎన్నికల్లో ఎలాంటి అవాంఛనీయ ఘటనలు తలెత్తకుండా ఉండేందుకు పోలీసులు పటిష్ఠ భద్రతను ఏర్పాటు చేశారు.
మాజీ ముఖ్యమంత్రి X మంత్రి
ఝార్ఖండ్ మాజీ ముఖ్యమంత్రి, జేఎంఎం ప్రముఖ నేత హేమంత్ సోరెన్తో పాటు ఇద్దరు రాష్ట్ర మంత్రులు ఈ ఎన్నికల్లో తమ అదృష్టాన్ని పరీక్షించుకుంటున్నారు. దుమ్కా, బర్హెట్ రెండు స్థానాల్లో సోరెన్ ఎన్నికల బరిలో నిలవగా.. దుమ్కాలో సోరెన్కు పోటీగా భాజపా మహిళా నేత, శిశు సంక్షేమశాఖ మంత్రి లూయిస్ మరాండీ బరిలోకి దిగుతున్నారు. ఫలితంగా అక్కడ ఆయనకు గట్టి పోటీ తప్పేలా లేదు. మరో భాజపా నేత, ఝార్ఖండ్ వ్యవసాయశాఖ మంత్రి రాన్ధిర్ సింగ్.. శరత్ నియోజకవర్గం నుంచి పోటీ చేస్తున్నారు.
81 స్థానాలు.. 5 విడతలు
ఝార్ఖండ్లోని మొత్తం 81 అసెంబ్లీ స్థానాలకు ఐదు విడతలుగా ఎన్నికలు నిర్వహిస్తున్నారు. నవంబరు 30 నుంచి డిసెంబరు 16 వరకు నాలుగు విడతలుగా ఇప్పటికే 65 స్థానాలకు ఎన్నికలు జరిగాయి. మిగతా 16 స్థానాలకు ఇవాళ ఓటింగ్ జరగనుంది.
