ఈ రోజుల్లో రోడ్డెక్కామంటే చాలు.. ఇంటికి వచ్చే వరకూ అనుమానమే. అతివేగం, గుంతలు పడ్డ రోడ్లు, ట్రాఫిక్ ఉల్లంఘనులతో అడుగడుగునా గండాలే. అందుకే రోడ్డు ప్రమాదాల్లోనే ఏటా వేలాది మంది ప్రాణాలు కోల్పోతున్నారు. అయితే.. హిమాచల్ప్రదేశ్లోని మండి జిల్లా వాసులు మాత్రం ఈ రోడ్డు ప్రమాదాలు తమ దరికి చేరవని ధీమాగా చెబుతున్నారు. ఎందుకంటే వారి వాహనాల నంబరు ప్లేట్లను 'వనశీరా స్వామి'కి సమర్పించేశారు మరి!
మండి జిల్లా కర్సోగ్కు 25 కిలోమీటర్ల దూరంలో వనశీరా ఆలయం ఉంది. ఇక్కడ వాహనాల నంబర్ ప్లేటు సమర్పిస్తే.. ఇక ఎలాంటి ప్రమాదం జరగదని ఇక్కడివారి నమ్మకం.
"ఇక్కడ వనశీరా దేవుడు ఉన్నాడు. ఈ మార్గంలో మేము ఎప్పుడు ప్రయాణించినా.. మా వాహనం నెంబర్ ప్లేట్ మేము ఇక్కడే బిగిస్తాం. ఇతర వాహనాల వల్ల మా వాహనానికి ఎలాంటి ప్రమాదం వాటిల్లకూడదని మేము కోరుకుంటాం."
-షేర్ సింగ్, చోదకుడు
ఎంత హడావిడిగా వెళ్తున్నా సరే.. వనశీరా స్వామి ఆశీర్వాదం తీసుకోకపోతే ప్రయాణం సాఫీగా సాగదని భక్తులు అంటున్నారు. అక్కడ ఆగి నెంబర్ప్లేట్లు ఈ చెట్టుకు తగిలించాలి, లేదా కనీసం వాహనంలో విరిపోయిన భాగాలైనా గుర్తుగా పెట్టాలి. ఇలా చేయడం వల్ల ట్రాఫిక్ నియమాలు పాటించకపోయినా.. స్వామి వారు ఆ వాహనాన్ని గుర్తుపెట్టుకుని మరీ ఆపదలో కాపాడుతాడంటున్నారు స్థానికులు.
"ఈ వనశీరా దేవుడి ముందు నుంచి వెళ్లేటప్పుడు.. దూపదీపాలతో పూజలు చేస్తాం. విరిగిపోయిన వాహన భాగాలను దేవుడికి సమర్పిస్తాం. ఇలా చేయడం వల్ల మా వాహనాలకు ఎలాంటి ప్రమాదం జరగదని నమ్ముతాం."
-రామ్ సరన్, స్థానికుడు
మూఢనమ్మకాలను వీడాలని ఎంతో మంది ప్రచారం చేస్తున్నారు. అయినా వింత నమ్మకాలు ఇప్పటికీ కొత్త పుంతలు తొక్కుతూనే ఉన్నాయని పలువురు అభిప్రాయపడుతున్నారు.
ఇదీ చదవండి:ఏటా ఎగిరే గాలిపటాల జోరు.. ఈ సారి తగ్గింది!
