'రాహుల్​ విదేశీ పర్యటనల వెనుక మర్మం ఏంటో?'​

కాంగ్రెస్ నేత రాహుల్ గాంధీని లక్ష్యంగా చేసుకుని భాజపా విమర్శలు గుప్పించింది. రాహుల్ తరచూ చేస్తున్న విదేశీ పర్యటనల మర్మం ఏంటని? ఆయనేమైనా రహస్య కార్యక్రమాల్లో పాల్గొంటున్నారా? అని భాజపా అధికార ప్రతినిధి జీవీఎల్ నరసింహారావు ​ప్రశ్నించారు.

కాంగ్రెస్ నేత రాహుల్​గాంధీ తరచూ విదేశీ పర్యటనలు చేయడంపై భాజపా విమర్శలు గుప్పించింది. రాహుల్ విదేశీ పర్యటనల విషయంలో గోప్యత ఎందుకని, ఆయనేమైనా రహస్య కార్యక్రమాల్లో పాల్గొంటున్నారా? అని ప్రశ్నించింది. ప్రపంచమంతా ధ్యానం (మెడిటేషన్​) కోసం భారత్​కు వస్తుంటే, రాహుల్ మాత్రం విదేశాలకు వెళ్తారని జీవీఎల్​​ వ్యంగ్యంగా వ్యాఖ్యానించారు.

"రాహుల్ గాంధీ తరచూ విదేశీ పర్యటనలకు వెళ్లడంపై ప్రజల్లో అనేక అనుమానాలకు తావిస్తోంది. ఆయన ఎందుకు వెళ్తున్నారు? ఎక్కడికి వెళ్తున్నారు? ఇలాంటి ఖరీదైన విదేశీ పర్యటనలకు ఆయనకు డబ్బు ఎక్కడి నుంచి వస్తోందో చెప్పాలి. ఎందుకంటే ఒక సాధారణ ఎంపీ ఇంత ధనం సంపాదించలేరు.

గత ఐదేళ్లలో ఆయన 16 సార్లు విదేశీ పర్యటనలకు వెళ్లారు. ఇది ఆయన ఒకప్పటి సొంత లోక్​సభ నియోజకవర్గమైన ఉత్తరప్రదేశ్​లోని అమేఠీని సందర్శించిన సంఖ్య కంటే చాలా ఎక్కువ. రాహుల్​గాంధీని అమేఠీ ప్రజలు నిరాకరించడానికి ఇదీ ఓ కారణం."- జీవీఎల్​ నరసింహారావు, భాజపా అధికార ప్రతినిధి

నిబంధనలు పాటించాలి

జులై 3న పార్లమెంటరీ వ్యవహారాల మంత్రి ప్రహ్లాద్ జోషీ.. ఎంపీలు అనుసరించాల్సిన నియమనిబంధనలను ఓ లేఖ ద్వారా వెల్లడించారు. దీనిని ఉదహరిస్తూ ఎంపీలు ప్రైవేటుగా విదేశీ పర్యటనలు చేపట్టినా, ముందుగా పార్లమెంటుకు తెలియజేయాల్సి ఉందని పేర్కొన్నారు జీవీఎల్​. అయితే లోక్​సభ సచివాలయానికి తన విదేశీ పర్యటనల గురించి రాహుల్ ఎలాంటి సమాచారం అందించలేదని ఆయన విమర్శించారు.

కంచు కోటలో ఓటమి

ఈ ఏడాది జరిగిన సార్వత్రిక ఎన్నికల్లో రాహుల్​గాంధీ తన సొంత నియోజకవర్గం, కాంగ్రెస్ కంచుకోట అమేఠీలో ఓటమిపాలయ్యారు. అదే సమయంలో కేరళలోని వాయనాడ్​ నుంచి భారీ మెజారిటీతో గెలుపొందారు.

ఇదీ చూడండి: 'ఆర్టికల్ 370 రద్దు నిర్ణయం సర్దార్​కు అంకితం'