శబ్దాలు చేసేవి కావు.. ఇవి నోరూరించే టపాకాయలు!

దీపావళికి మీరు బోలెడు మిఠాయిలు పంచుతారా? కుటుంబ సభ్యులతో కలిసి టపాసులు పేల్చుతారా? అయితే.. ఈ దీపావళికి మీరు ఖర్చు తగ్గించుకోవచ్చు.. పటాసులు, మిఠాయిలు వేరువేరుగా కొనాల్సిన పని లేదు. ఎందుకంటే ఇప్పుడు నోరు తీపి చేసే టపాసులు వచ్చేశాయ్​!

'అన్నా.. కాకరపువ్వొత్తి నువ్వు తిను, ఈ చిచ్చుబుడ్డేమో నేను తింటా' అంటుంది ఓ ఇంట్లో చెల్లి. మరో ఇంట్లో 'వదినా ఈ రాకెట్​ తిని చూడు ఎంత రుచిగా ఉందో' అంటుందో మరదలు. స్నేహితులతో ఉన్న ఓ కుర్రాడు ' ఒరేయ్​ మామా.. ఆ లక్ష్మీ బాంబు, భూ చక్రాలు ఇంకొన్ని కొనుక్కొచ్చి తిందాంరా!' అంటున్నాడు. అవును ఈ సారి దీపావళికి చాలా ఇళ్లల్లో ఇలాంటి మాటలే వినిపించబోతున్నాయి. ఎందుకంటే ఇప్పుడు నోట్లో వేసుకుంటే కరిగిపోయే మిఠాయి పటాసులు మార్కెట్లోకి వచ్చేశాయి మరి.

చాక్లెట్​ దీపావళి..

దీపావళి అంటే అచ్చంగా దీపాల పండగే. కానీ, మనం పండుగ ప్రాముఖ్యం తెలుసుకోక రణగొణ ధ్వనులు చేసే టపాసులు పేల్చుతున్నాం. విషపూరిత వాయువులతో ప్రకృతిని నాశనం చేస్తూ పండుగ అర్థాన్నే మార్చేస్తున్నాం. అందుకే పర్యావరణానికి హాని కలిగించకుండా బెంగళూరులోని ఔబ్రీ సంస్థ ఈ ప్రత్యేకమైన చాక్లెట్​ టపాసులను తయారు చేసింది.

ఈ మిఠాయి కొట్టులో నోరూరించే టపాసులు దొరుకుతాయి. అయితే అవి శబ్దాలు చేయవు, మంటలు పుట్టించవు. కడుపు నింపుతాయి. సంతోషాలు పంచుతాయంతే. అందుకే చిన్నాపెద్దా తేడా లేకుండా ఎగబడి మరీ వీటిని కొనేస్తున్నారు.

ఎన్ని రకాలో...

వీటిలో చాలా ఫ్లేవర్స్​ కూడా ఉన్నాయండోయ్.. చాకో చక్రా, క్రిస్పీ పటాకా, బట్టర్​స్కార్చ్​ ఫ్లవర్​పాట్​, కాఫీ రాకెట్​, ఇలాచీ ఆటమ్​బాంబ్​, క్రస్పీ షాట్స్​, ఫెస్టీవ్​ మోటిఫ్​ వంటి ఎన్నో రకాలున్నాయి. పండుగ రోజు తమకిష్టమైన వారి నోరు తీపి చేసి, శుభాకాంక్షలు తెలిపేందుకు వీటిని పండుగ బహుమతులుగా పంచేందుకు ముందే కొనేస్తున్నారు ఇక్కడి వారు.

ఈ దీపావళికి రుచికి రుచితో పాటు టపాసులు కొన్నామన్న సంతృప్తినిచ్చే ఈ పటాసులతో.. పర్యావరణానికి హానీ కలిగించకుండా, శబ్దాలతో పరిసర జంతువులను హడలెత్తించకుండా వినూత్నంగా జరుపుకోవాలని.. ఔబ్రీ సంస్థ యజమాని శ్రీధర్​ మూర్తీ అంటున్నారు.

ఇదీ చూడండి:కర్తార్​పుర్ యాత్రలో పాటించాల్సిన నియమాలు ఇవే..