ఆమ్ఆద్మీ పార్టీ ... దిల్లీ అసెంబ్లీ ఎన్నికల్లో అధికార పీఠమే లక్ష్యంగా వ్యూహాత్మకంగా అడుగులు వేస్తోంది. 'కామ్ కీ చాయ్' అంటూ టీ స్టాల్ను ఏర్పాటు చేసి వినూత్న ప్రచారాన్ని లాంఛనంగా ప్రారంభించింది. ప్రజలకు చేరువవటానికి గతంలో మోదీ ఉపయోగించిన 'చాయ్ పే చర్చ' అస్త్రాన్నే ఆప్ వినియోగించి అన్నీ అసెంబ్లీ నియోజకవర్గాల్లో టీ స్టాల్స్ను ఏర్పాటు చేయడానికి సమాయత్తమవుతుంది.
'కామ్ కీ చాయ్' ఏంటి?
కామ్ కీ చాయ్... ఆమ్ఆద్మీ పార్టీ అధికారం చేపట్టినప్పటి నుంచి ప్రభుత్వం అమలు చేసిన అభివృద్ధి పథకాలు...వాటి పురోగతిని ప్రజలకు వివరించడం దీని ఉద్దేశం. ఇక్కడ విక్రయించే టీలకు వివిధ పథకాల పేర్లను పెట్టి ప్రచారం చేస్తోంది.
రకరకాల 'టీ'లు
ఈ టీ స్టాల్స్లో... ప్రభుత్వం అభివృద్ధి చేసిన పథకాల పేర్లనే వివిధ 'టీ'లకు నామకరణం చేసి విక్రయిస్తోంది. 'శిక్షా వాలీ చాయ్', 'స్వాస్థ్య వాలీ చాయ్', 'వికాస్ వాలీ చాయ్', 'స్పెషల్ చాయ్' ఇక్కడ దొరుకుతాయి.
శిక్షా వాలీ చాయ్
విద్యా, క్రీడా రంగాల్లో ప్రభుత్వం తీసుకొచ్చిన నూతన సదుపాయలు, మెగా ఉపాధ్యాయ-తల్లిదండ్రుల సమావేశం ఏర్పాటు వంటి అంశాలను ఈ చాయ్ ద్వారా ప్రజలకు వివరిస్తోంది.
స్వాస్థ్య వాలీ చాయ్
ప్రభుత్వ ఆసుపత్రుల్లో తీసుకొచ్చిన మెరుగైన వైద్యసేవలు, ఉచిత పరీక్షలు, శస్త్రచికిత్సలు, మందులు, మోహల్లా, పాలీ క్లినిక్స్ గురించి చెబుతుంది.
స్పెషల్ టీ
దిల్లీ వాసులకు ప్రభుత్వం అందించిన ఉచిత మౌలిక సదుపాయలు... తక్కువ ఛార్జీ విద్యుత్త్, నీరు, మహిళలకు ఉచిత బస్సు ప్రయాణం వంటి అంశాలను ప్రజలకు తెలియజేస్తుంది.
వికాస్ వాలీ చాయ్
డోర్ డెలివరీ సేవలు, సీసీటీవి అమర్చడం, ఉచిత వైఫై వంటి సేవలను వివరిస్తుంది.
మోదీ 'చాయ్ పే చర్చ'
గతంలో ప్రధాన మంత్రి నరేంద్ర మోదీ... ప్రజలకు చేరువవడానికి తమ ప్రభుత్వం చేపట్టిన పురోగతిని ఈ 'చాయ్ పే చర్చ' ద్వారా తెలియచెప్పడానికి ఈ ప్రచారాన్ని ప్రారంభించారు. ఈ ప్రచారాన్ని విమర్శిస్తూ అహ్మదాబాద్కు చెందిన ప్రఫుల్ బిల్లర్ అనే వ్యక్తి ఇదే ఉపాయాన్ని కేజ్రీవాల్కు చెప్పి ఈ 'కామ్ కీ చాయ్' ప్రచారానికి సృష్టికర్తయ్యాడు. ఈ కార్యక్రమంలో అతనే స్వయంగా పాల్గొని టీ విక్రయించాడు.
దిల్లీలోని 70 అసెంబ్లీ స్థానాలకు ఒకే విడతలో ఫ్రిబవరి 8న ఎన్నికలు జరగనున్నాయి. 11వ తేదీన ఫలితాలు వెలువడతాయి.
ఇదీ చదవండి: నేతాజీకి భారతావని రుణపడి ఉంటుంది: మోదీ
