ప్రకాశం జిల్లాలో ఆగిన బాలామృతం... అందని పౌష్టికాహారం

పుట్టిన బిడ్డకి తల్లి పాలు ఎంతో శ్రేష్ఠం. అందుకే.. బిడ్డ కోసం నవమాసాలు తల్లి మంచి పౌష్టికాహారం తీసుకోవాలని అందరికీ తెలిసిన విషయమే. పేద మధ్యతరగతి గర్భిణీల కోసం ప్రభుత్వం అంగన్​వాడీ కేంద్రాల్లో పౌష్టికాహారం అందిస్తున్నారు. ఇది ప్రకాశం జిల్లాలో సరిగా అమలు కావడం లేదు. కనీసం పాలు పోయడం లేదు. ఇతర పౌష్టికాహారాల సంగతి అంతంతమాత్రమే.

మాతా శిశు మరణాలు నివారించడానికి ప్రభుత్వం చేపట్టే చర్యలు క్షేత్రస్థాయిలో అమలు కావడం లేదు. అంగన్‌వాడీ కేంద్రాల ద్వారా గర్భిణీలకు, చిన్నారులకు ఇచ్చే పౌష్టికాహారం లబ్ధిదారులకు సరిగా అందడం లేదు. బాలామృతం పేరుతో ఆహారం, కోడిగుడ్లతోపాటు పాలు పంపిణీ చేయాల్సి ఉన్నా వారికి చేరడం లేదు. ప్రకాశం జిల్లాలో రెండునెలలుగా పాల పంపిణీ నిలపేశారు.

అమృత హస్తం.. అమలుకు కష్టం

జిల్లాలో 21 ప్రాజెక్టుల్లో 4 వేల 244 అంగన్​వాడీ కేంద్రాలు ఉన్నాయి. ఇందులో చిన్నారులు 2.49 లక్షలు, గర్భిణీలు 23 వేలు, బాలింతలు 22 వేల మంది ఉన్నారు. బలమైన ఆహారాన్ని అందించడానికి 2015లో అప్పటి తెదేపా ప్రభుత్వం అమృత హస్తం పథకాన్ని ప్రారంభించింది. ఓ మెనూ ప్రకారం పోషకాలతో కూడిన ఆహారాన్ని అందించాలి. గర్భిణీలకు, బాలింతలకు రోజుకు 200 మిల్లీలీటర్లు, చిన్నారులకు 100 మిల్లీ లీటర్లు పాలు ఇవ్వాలి. గత 2 నెలలుగా ఈ మెనూ అమలు కావడం లేదు.

సరఫరా లేదు

జిల్లాలోని అన్ని ప్రాజెక్టుల్లో ఇదే పరిస్థితి. జిల్లాలో 57 శాతం రక్తహీనత కలిగిన మహిళలు ఉన్నట్లు గుర్తించారు. బాలామృతం, గుడ్లు , పాలు సక్రమంగా ఇవ్వడంలేదు. గుడ్లు నెలకు 25 ఇవ్వాల్సి ఉండగా, 15కి మించి సరఫరా చేయడం లేదు. కందిపప్పు వంటివాటిలోనూ కోత విధిస్తున్నారనే విమర్శలు వస్తున్నాయి. పూర్తిస్థాయిలో పౌష్టికాహారం అందించి నాణ్యమైన పాలు సరఫరా చేయాలని బాధితులు కోరుతున్నారు.

ఇవి కూడా చదవండి: