ఆ ఒక్కడి ప్రయాణం...వేల మందికి ఆదర్శం

శోధించు... సాధించు... ఆవిష్కరించు... అనే నినాదంతో సామాజిక సేవలో పాలుపంచుకుంటుందో స్వచ్ఛంద సేవాసంస్థ.  యువతలో చైతన్యం నింపి, ప్రజా సమస్యలపై పోరాడుతుంది గుడివాడకు చెందిన వై.ఎస్.ఎస్ సంస్థ. యువకులతో కూడిన ఈ సంస్థ తోటివారిలో నవోత్సహం నింపుతూ సేవాగుణాన్ని చాటుతుంది.

స్వచ్ఛంద సంస్థల్లో ఒక్కొక్కరి ఒక్కోదారి. కొందరు పేదల సేవలో పాలుపంచుకుంటే మరికొందరు సామాజికచైతన్యంలో భాగస్వామ్యులు అవుతారు. ఈ సేవల్లో విభిన్నత చూపుతున్నారు... కృష్ణాజిల్లా గుడివాడకు చెందిన యూత్ ఫర్ సోషల్ సర్వీస్ (వైఎస్​ఎస్) స్వచ్ఛంద సంస్థ. యువతను సామాజిక సేవా కార్యక్రమాల్లో భాగస్వామ్యులను చేసే ప్రయత్నం చేస్తుంది. సమాజ అభ్యున్నతికి తమ వంతు కృషి చేస్తుంది.

యువతలో నవోత్సాహం

గుడివాడకు చెందిన యోగేశ్వర్ రెడ్డి.. ఆరు నెలల క్రితం ఈ సంస్థను స్థాపించారు. శోధించు, సాధించు, ఆవిష్కరించు అనే నినాదాన్ని లక్ష్యంగా ఎంచుకున్నారు. విద్యార్థులను సభ్యులుగా ఎంచుకుని సేవా కార్యక్రమాలు నిర్వహిస్తున్నారు. ర్యాంకుల కోసం పోటీపడుతున్న నేటి యువత శారీరక, మానసిక ఆరోగ్యాన్ని నిర్లక్ష్యం చేస్తున్నారు. ఈ నిర్లక్ష్యం వారి ఆరోగ్యంపై తీవ్రప్రభావం చూపుతుంది. ఈ అంశాలపై విద్యార్థుల్లో అవగాహన కల్పిస్తున్నారు. క్రీడల నిర్వహణ, మానసిక దృఢత్వం పెంచేలా యోగా తరగతులు, ధ్యానం వంటి కార్యక్రమాలు ఏర్పాటుచేస్తున్నారు.