కృష్ణాజిల్లా గన్నవరం రాజకీయం వేడెక్కుతోంది. త్వరలోనే వైకాపాలో చేరతారనే వార్త ప్రచారం జరుగుతున్న వేళ ఎమ్మెల్యే వల్లభనేని వంశీ ట్విస్ట్ ఇచ్చారు. ఎమ్మెల్యే పదవికి, తెలుగుదేశం పార్టీ ప్రాథమిక సభ్యత్వానికి రాజీనామా చేస్తున్నట్లు చంద్రబాబుకు లేఖ రాశారు. రాజకీయాల నుంచి పూర్తిగా వైదొలుగుతున్నట్టు అందులో పేర్కొన్నారు.
వేరే మార్గం లేదు...
ఇటీవల ఎన్నికల్లో ఎమ్మెల్యేగా గెలిచాక తనను, తన అనుచరులను స్థానిక వైకాపా నేతలు, కొందరు అధికారులు ఇబ్బంది పెడుతున్నారని లేఖలో వెల్లడించారు. ఈ విషయం తనను కలచివేస్తోందని ఆవేదన వ్యక్తం చేశారు. తన అనుచర వర్గాన్ని కాపాడుకునేందుకు ఇంతకన్నా వేరే మార్గం లేదని లేఖలో స్పష్టం చేశారు.
వైకాపాలో చెరతారనే ప్రచారం...
ఇటీవల మంత్రులు కొడాలి నాని, పేర్ని నానితో కలిసి తాడేపల్లిలో సీఎం జగన్‌తో వంశీ భేటీ అయ్యారు. ఈ నేపథ్యంలో వంశీ వైకాపాలో చేరతారనే ప్రచారం జోరుగా సాగింది. అయితే పార్టీ మారే ఉద్దేశమే ఉంటే స్థానిక వైకాపా నేతలు, అధికారులపై ఎందుకు ఆరోపణలు చేశారనే కోణంలో కొత్త ప్రశ్నలు ఉత్పన్నమయ్యాయి. పార్టీ మార్పు అనే అంశం పక్కన పడిపోయి రాజకీయాల నుంచే తప్పుకుంటున్నట్టు వంశీ చెప్పటంతో గన్నవరం రాజకీయ వర్గాల్లో చర్చకు దారితీసింది.
కలిసికట్టుగా పోరాడదాం....
తనకు వంశీ రాసిన లేఖకు తెదేపా అధినేత చంద్రబాబు స్పందించారు. పార్టీపరంగా, వ్యక్తిగతంగా అండగా ఉంటానని భరోసా కల్పిస్తూ ప్రత్యుత్తరం రాశారు. అప్రజాస్వామిక విధానాలపై కలిసికట్టుగా పోరాడదామని సూచించారు. పార్టీ కార్యకర్తలకు అన్యాయం జరగకుండా ఉండేందుకు... ఎంతవరకైనా పోరాడేందుకు సిద్ధమని భరోసానిచ్చారు. పార్టీ నేతలపై జరుగుతున్న దాడులపై ఇప్పటికే పోరాటం చేస్తున్న విషయం గుర్తు చేసిన చంద్రబాబు... అనైతిక చర్యలకు ముగింపు పలికేవరకు ఇది కొనసాగుతుందని స్పష్టం చేశారు.
నకిలీ ఇళ్ల పట్టాల కేసే కారణమా...?
వంశీపై ఒత్తిడి పెరగడానికి నకిలీ ఇళ్లపట్టాల పంపిణీ కేసు ప్రధాన కారణమని తెలుస్తోంది. తాజా పరిణామాలతో ఈ వ్యవహరం ఏ క్షణం ఏ మలుపు తిరుగుతుందోనని సర్వత్రా ఆసక్తిగా మారింది.
ఇవీ చూడండి-వల్లభనేని వంశీ లేఖపై చంద్రబాబు ఏమన్నారంటే..!
