తిరుగిరులు శ్రీవారి సాలకట్ల బ్రహ్మోత్సవ శోభతో పులకించిపోతున్నాయి. దేవదేవుడి బ్రహోత్సవాలకు శాస్త్రోక్తంగా అంకురార్పణ చేసిన వేదపండితులు మీన లగ్న శుభముహూర్తాన ఈ సాయంత్రం 5గంటల 23 నిమిషాలకు ధ్వజారోహణం నిర్వహించనున్నారు. రాత్రి 7 గంటలకు రాష్ట్ర ప్రభుత్వం తరపున ముఖ్యమంత్రి జగన్ శ్రీవారికి పట్టు వస్త్రాలు సమర్పిస్తారు. సీఎం హాదాలో తొలిసారి పట్టువస్త్రాలు సమర్పించనున్న జగన్... 8 గంటలకు ప్రారంభమయ్యే పెద్దశేష వాహన సేవలో పాల్గొని రాత్రికి తిరుమలలోనే బస చేయనున్నారు.
7పడగల శేషుడిపై శ్రీదేవి భూదేవీ సమేతుడైన మలయప్పస్వామి కొలువుదీరి మాడవీధుల్లో... భక్తులకు అభయప్రదానం చేయనున్నారు. బ్రహ్మోత్సవాలతోపాటు సీఎం జగన్ రాక దృష్ట్యా తిరుమలలో పటిష్ట భద్రత ఏర్పాటు చేశారు. 3వేల 200 మంది పోలీసులను మోహరించారు. లక్షలాదిగా తరలివచ్చే భక్తుల రవాణా సౌకర్యార్థం తిరుమల ఘాట్‌రోడ్డులో 24 గంటలూ వాహనాలను అనుమతిస్తున్నారు.
కొండపైన పార్కింగ్ సౌకర్యాలపై ప్రత్యేక యాప్‌కూడా అందుబాటులోకి తెచ్చారు. ఉదయం 8 నుంచి.. రాత్రి 12 గంటల వరకూ అన్న ప్రసాద వితరణ చేయనున్నారు. 3వేల మంది శ్రీవారి సేవకులు, వెయ్యి మంది స్కౌట్స్ అండ్‌ గైడ్స్, 700 మంది గరుడ సహాయక్ విద్యార్థులు భక్తులకు సేవలందించనున్నారు.
అన్ని ఆర్జిత సేవలు, బ్రేక్ దర్శనాలు చంటిపిల్లలు, వృద్ధుల ప్రత్యేక దర్శనాలు రద్దు చేశామన్న తితిదే ఈవో... భక్తులు సంయమనం పాటించాలని విజ్ఞప్తి చేశారు. తిరుమల పర్యటనలో భాగంగా మాతృశ్రీ వకుళామాత విశ్రాంతి భవన నిర్మాణానికి శంకుస్థాపన చేయనున్న జగన్ తిరుచానూరులో రూ.75 కోట్ల వ్యయంతో నిర్మించిన యాత్రికుల వసతి సముదాయాన్నీ ప్రారంభిస్తారు.
ఇదీ చదవండీ... శ్రీవారి బ్రహ్మోత్సవాలకు వైభవంగా అంకురార్పణ
