గిన్నిస్ రికార్డు ఒక్కసారి సాధిస్తేనే అద్భుతమని అంటారు. అలాంటిది ఏకంగా నాలుగుసార్లు గిన్నిస్ బుక్ ఆఫ్ వరల్డ్ రికార్డులో చోటు దక్కించుకున్నాడు హైదరాబాద్ తైక్వాండ్ ప్లేయర్ సాయి దీపక్. 60 సెకండ్లలో 59 సైడ్లాంజ్లు తీసి నాలుగోసారి ఈ ఘనత సాధించాడు.
ఒక్క నిమిషంలో అత్యధిక సైడ్లాంజ్లు తీసిన ఘనత అంతకుముందు పాకిస్థాన్కు చెందిన ఇర్ఫాన్ మెహసూద్ పేరిట ఉండేది. తాజాగా ఆ రికార్డును బద్దలు కొట్టాడు 23 ఏళ్ల దీపక్. మహిళల భద్రత, ఆర్మీలో ప్రాణత్యాగం చేసిన సైనికులకు, ఫిట్ ఇండియా కార్యక్రమం అభివృద్ధి కోసం ఈ రికార్డును అంకితమిస్తున్నాని దీపక్ చెప్పాడు.
"ఒక్క నిమిషంలో అత్యధిక సైడ్లాంజ్లు తీసి ఈ రికార్డు సాధించా. 59 సైడ్లాంజ్లతో నాలుగోసారి గిన్నిస్ బుక్లో చోటు సంపాదించా. గతంలో పాకిస్థాన్కు చెందిన ఇర్ఫాన్ మెహసూద్ 54 సైడ్లాంజ్లు తీశాడు. నేను ఈ రికార్డు బ్రేక్ చేయడానికి మూడు నుంచి నాలుగు నెలలు పాటు ఎంతో కష్టపడ్డా. ఒక్క నిమిషంలో ఈ ఘనత సాధించడం చాలా కష్టం. ఈ ఏడాది మరో 2, 3 గిన్నిస్ రికార్డులు సాధిస్తానని అనుకుంటున్నా" -సాయి దీపక్, తైక్వాండో ప్లేయర్
2024 ఒలింపిక్సే దీపక్ లక్ష్యమని కోచ్ జయంత్ రెడ్డి చెప్పాడు.
"గిన్నిస్ వరల్డ్ రికార్డు సాధించేందుకు దీపక్కు నేను శిక్షణనిస్తున్నా. కానీ అతడి లక్ష్యం మాత్రం 2024 ఒలింపిక్స్లో తైక్వాండోలో భారత్కు ప్రాతినిధ్యం వహించడం. అందుకోసం సన్నద్ధమవుతూ.. మరోపక్క గిన్నిస్ రికార్డు బద్దలు కొడుతున్నాడు. ఈ ఏడాది మరో 10 రికార్డులు బ్రేక్ చేసేందుకు ప్లాన్ చేస్తున్నాం" -జయంత్ రెడ్డి, దీపక్ కోచ్
దీపక్ ఇంతకుముందు ఒక్క నిమిషంలో అత్యధిక ఎల్బో స్ట్రైక్లు, మూడు నిమిషాల్లో అత్యధిక నీ స్ట్రైక్స్(మోకాలుతో తన్నడం) తీసి గిన్నిస్ రికార్డు కైవసం చేసుకున్నాడు. 5కేజీల బరువున్న యాంకెల్ వెయిట్స్ ధరించి ఒక కాలుతో నీస్ట్రైక్స్(మోకాలితో) చేసి మూడో సారి గిన్నిస్ రికార్డు దక్కించుకున్నాడు.
ఇదీ చదవండి: జనవరి 18న భారత ఆర్చరీ సంఘానికి ఎన్నికలు
