పాకిస్థాన్తో జరిగిన రెండో టెస్టులో ఆస్ట్రేలియా ఆటగాడు స్టీవ్ స్మిత్ ఫీల్డింగ్ సెట్ చేయడం తనకు నచ్చలేదని అన్నాడు ఇయాన్ చాపెల్. మ్యాచ్ మధ్యలో.. ఫీల్డర్లను మార్చమని స్మిత్ పైన్కు సూచించాడని చెప్పాడు ఆసీస్ మాజీ సారథి చాపెల్.
"ఫీల్డర్స్ మధ్యలో స్మిత్ అలా నడుచుకుంటూ వెళ్లడం నాకు నచ్చలేదు. మ్యాచ్ మధ్యలో ఆఫ్ సైడ్ ఫీల్డర్ను పెట్టాలని టిమ్ పైన్కు స్మిత్ సూచించాడు. అయితే ఆసీస్ సారథి అతడు చెప్పినట్లు చేశాడో లేదో తెలియదు. ఇలా చేయడం నాకు ఇష్టముండదు. స్మిత్ తీరు వైట్ యాంటింగ్(దిగజార్చడం)లా ఉంది" -ఇయాన్ చాపెల్, ఆసీస్ మాజీ కెప్టెన్.
2018లో బాల్ ట్యాంపరింగ్ వివాదంతో ఏడాది పాటు నిషేధం ఎదుర్కొన్నాడు స్మిత్. ఈ ఘటనతో అప్పటివరకు కెప్టెన్గా ఉన్న స్మిత్ స్థానంలో టిమ్పైన్ టెస్టు జట్టు సారథ్య బాధ్యతలు తీసుకున్నాడు. ఈ ఏడాది ప్రపంచకప్లో పునరాగమనం చేసిన స్మిత్.. తన బ్యాటింగ్తో ఆకట్టుకుంటున్నాడు. ఇటీవల జరిగిన యాషెస్ సిరీస్లోనూ సత్తాచాటాడు.
అడిలైడ్ వేదికగా పాకిస్థాన్తో జరిగిన ఈ మ్యాచ్లో ఆస్ట్రేలియా ఇన్నింగ్స్ 48 పరుగుల తేడాతో విజయం సాధించింది. రెండు టెస్టుల సిరీస్ను 2-0 తేడాతో క్లీన్ స్వీప్ చేసింది. డేవిడ్ వార్నర్.. తొలి టెస్టులో శతకంతో పాటు.. రెండో టెస్టులో ట్రిపుల్ సెంచరీ చేసి మ్యాన్ ఆఫ్ ద సిరీస్ దక్కించుకున్నాడు.
ఇదీ చదవండి: టీ20ల్లో రికార్డు.. పరుగులేమి ఇవ్వకుండా 6 వికెట్లు
