అండర్ 19 ప్రపంచకప్ ఫైనల్లో గెలిచిన బంగ్లాదేశ్.. తొలిసారి కప్పును ముద్దాడింది. డిఫెండింగ్ ఛాంపియన్ టీమిండియాపై 3 వికెట్ల తేడాతో విజయం సాధించింది. బంగ్లా ఆటగాళ్లు సమష్టిగా రాణించడం వల్ల భారత్ ఓటమి పాలైంది. ఈ టోర్నీ తుదిపోరు అర్హత సాధించిన తొలిసారే విజేతగా నిలిచింది బంగ్లా.
ఈ మ్యాచ్లో టాస్ ఓడి బ్యాటింగ్కు దిగిన భారత్.. 47.2 ఓవర్లలో అన్ని వికెట్లు కోల్పోయి 177 పరుగులు చేసింది. బంగ్లా బౌలర్లు కట్టుదిట్టంగా బౌలింగ్ చేయడం వల్ల మన బ్యాట్స్మెన్.. పరుగులు చేయడంలో తడబడ్డారు. ఓపెనర్ యశస్వి జైస్వాల్(88) మినహా అందరూ తక్కువ స్కోర్లకే పరిమితమయ్యారు.
178 పరుగుల లక్ష్యంతో బరిలోకి దిగిన బంగ్లాదేశ్ జట్టుకు ఓపెనర్లు శుభారంభం ఇచ్చారు. తొలి వికెట్కు 50 పరుగుల భాగస్వామ్యం నమోదు చేశారు. ఈ క్రమంలో భారత బౌలర్ రవి బిష్ణోయ్.. వెంట వెంటనే నాలుగు వికెట్లు తీసి ప్రత్యర్థి జట్టులో కలవరం రేపాడు.
ఓవైపు వికెట్లు పడుతున్నా బంగ్లా బ్యాట్స్మన్ పర్వేజ్ ఎమోన్ మాత్రం ఒంటరి పోరాటం చేశాడు. ఈ క్రమంలోనే గాయంతో రిటైర్డ్ హర్ట్గా వెనుదిరిగాడు. ఆ తర్వాత వచ్చిన షమీం హసన్, అవిషేక్ దాస్తో కలిసి అక్బర్ అలీ జాగ్రత్తగా ఆడాడు. అలా ఆడుతూనే పెవిలియన్కు చేరారు. ఆ తర్వాత క్రీజులోకి వచ్చిన పర్వేజ్కు.. అక్బర్ అలీ అండగా నిలిచాడు.
ఇద్దరూ కలిసి 40 పరుగుల భాగస్వామ్యం నెలకొల్పారు. ఈ తరుణంలో జైస్వాల్ బ్రేక్ ఇచ్చాడు. 79 బంతుల్లో 47 పరుగులు చేసి అర్ధ సెంచరీకి చేరువలో ఉన్న ఎమోన్ను ఔట్ చేశాడు. ఆ తర్వాత క్రీజులోకి వచ్చిన రకిబుల్ హసన్తో కలిసి అక్బర్ అలీ జాగ్రత్తగా ఆడాడు.
విజయానికి 54 బంతుల్లో 15 పరుగులు అవసరమైన తరుణంలో వర్షం పడింది. దాంతో అంపైర్లు డక్ వర్త్ లూయీస్ ప్రకారం 29 బంతుల్లో లక్ష్యాన్ని 6 పరుగులుగా నిర్దేశించారు. ఆ తర్వాత లాంఛనాన్ని పూర్తి చేసింది బంగ్లాదేశ్.
