కోలీవుడ్ స్టార్ హీరో సూర్య.. కొన్నేళ్లుగా తెలుగులో ఆదరణ పొందలేకపోతున్నాడు. ఇటీవల కాలంలో వచ్చిన 'ఎన్జీకే', 'బందోబస్తు' చిత్రాలు టాలీవుడ్లో బోల్తా కొట్టాయి. ఈ నేపథ్యంలో ఆచితూచి అడుగులేస్తున్నాడు. ప్రస్తుతం ఈ హీరో 'ఆకాశం నీ హద్దురా' అనే బయోపిక్లో నటిస్తున్నాడు. వెట్రిమారన్ దర్శకత్వంలోనూ నటించేందుకు సిద్ధమయ్యాడు. అయితే ఈ సినిమా షూటింగ్ మొదలు కాకముందే చిక్కులు వచ్చిపడ్డాయి.
స్టార్ డైరెక్టర్ వెట్రిమారన్తో 'వాడి వాసల్' అనే సినిమా చేస్తున్నట్లు కొన్నిరోజుల క్రితం సూర్య ప్రకటించాడు. సీఎస్ చెల్లయ్య రచించిన ఓ నవల ఆధారంగా, జల్లికట్టు ప్రధానాంశంగా ఈ చిత్రాన్ని రూపొందిస్తున్నారు. ఇప్పటికే సంబంధిత హక్కులను కొనుగోలు చేశారు. కలైపులి ఎస్.థాను నిర్మాతగా వ్యవహరిస్తున్నారు.
అయితే ఈ సినిమా కథను పోలి ఉన్న కథను ఐదేళ్ల క్రితమే సూర్యకు చెప్పానని పూవి అనే రచయిత మీడియా ముందుకొచ్చాడు. అప్పుడు కొన్ని మార్పులు సూచించిన ఆయన, తర్వాత చేస్తానన్నారని తెలిపాడు. కానీ ఆ ప్రాజెక్టు కార్యరూపం దాల్చలేదని వెల్లడించాడు. ఇప్పుడు 'వాడి వాసల్' ప్రకటన చూసి షాక్కు గురయ్యానని అన్నాడు. ఇప్పటివరకు దీనిపై చిత్రబృందం స్పందించలేదు.
ఇదీ చదవండి: మాటల మాంత్రికుడు త్రివిక్రమ్ మరోసారి ఎన్టీఆర్తో!
