పత్రికల్లో వినోదాత్మక కథనాలే చదువుతున్నారా?

ఐఏఎస్​లు కనీసం పత్రికలు కూడా చదువుతున్నట్లు లేదని తెలంగాణ హైకోర్టు మండిపడింది. పత్రికల్లో ప్రతి పేజీలోనూ డెంగీ జ్వరంపై సమస్యలు వస్తున్నా పట్టించుకోవట్లేదని ఆగ్రహం వ్యక్తం చేసింది. పత్రికల్లో వినోదాత్మక కథనాలు మాత్రమే చదువుతున్నారా అని ప్రశ్నించింది.

డెంగీ నివారణకు తెరాస​ ప్రభుత్వం తీసుకున్న చర్యలపై ఆ రాష్ట్ర హైకోర్టు ఆగ్రహం వ్యక్తం చేసింది. సామాన్యులకు సమస్యలు వస్తే న్యాయస్థానం చూస్తూ ఊరుకోదని తేల్చిచెప్పింది. ఐఏఎస్​లు కనీసం పత్రికలు కూడా చదువుతున్నట్లు లేదని మండిపడింది. పత్రికల్లో డెంగీ జ్వరంపై అన్ని కథనాలొస్తున్నా పట్టించుకోవడం లేదని, వినోదాత్మక కథనాలు మాత్రమే చదువుతున్నారా అని నిలదీసింది. ఐఏఎస్​లు దేశ పౌరులు కాదని అనుకుంటున్నారా అని ప్రశ్నించింది. ఎంతో ఖర్చు చేసి.. ఐఏఎస్​లుగా తీర్చిదిద్దుతోంది ఈ తరహా పనికేనా అని మండిపడింది. నిర్లక్ష్యం చేస్తే ఉన్నతాధికారుల జేబుల నుంచి బాధితులకు డబ్బులు చెల్లించాల్సి ఉంటుందని హెచ్చరించింది. ఇకపై తీసుకున్న చర్యలను ప్రతి గురువారం కోర్టుకు వివరించాలని ఆదేశించింది.