ముళ్లకంచె ఛేదించి... మందడం రైతులను కలిసిన జనసేనాని

అమరావతిలో పవన్ కల్యాణ్ పర్యటనను పోలీసులు అడ్డుకోవడం... ఉద్రిక్తతకు దారితీసింది. సచివాలయంలో ఉన్న సీఎం జగన్‌ ఇంటికి వెళ్లే వరకూ మందడం వెళ్లనివ్వబోమని పోలీసులు అడుగడుగునా అడ్డుతగలగా పవన్‌ ఆగ్రహం వ్యక్తం చేశారు. ఆంక్షలు, ఇనుప కంచెలను దాటుకుంటూ... మందడం వెళ్లి రైతులకు సంఘీభావం తెలిపారు.

రాజధాని ప్రాంత రైతులకు సంఘీభావంగా జనసేన అధినేత పవన్‌ కల్యాణ్ చేపట్టిన పర్యటన ఉద్రిక్తతకు దారితీసింది. ఎర్రబాలెం, కృష్ణాయపాలెంలో రైతుల శిబిరాలను సందర్శించిన పవన్‌ ఆ తర్వాత అక్కడి నుంచి బయల్దేరారు. ఆ సమయంలో సచివాలయంలో ఉన్న సీఎం జగన్‌ ఇంటికి వెళ్లే వరకూ ఆ మార్గంలో అనుమతించడం కుదరదని పోలీసులు అడ్డుకున్నారు.

కృష్ణాయపాలెం నుంచి నేరుగా తుళ్లూరు వెళ్లాలని జనసేనానికి సూచించారు. అయితే మందడం రైతులు తమ గ్రామానికి రావాల్సిందేనని పట్టుబట్టారు. వారి విజ్ఞప్తిని మన్నించిన పవన్ మందడం బయల్దేరగా వెళ్లడానికి వీల్లేదని పోలీసులు స్పష్టంగా చెప్పారు. పరిస్థితి ఉద్రిక్తంగా మారడంతో పవన్ కారు దిగి నడుచుకుంటూ వెంకటపాలెం చెక్ పోస్టు వరకూ వెళ్లారు.

రోడ్డుపై బైఠాయించిన జనసేనాని

పోలీసుల ఆంక్షలపై ఆగ్రహం వ్యక్తం చేసిన మందడం రైతులు వెంకటపాలెం చెక్‌పోస్టు వద్దకు తరలివచ్చారు.రోడ్డుపై పోలీసులు ఇనుప కంచె వేసి అడ్డుకున్నారు. మందడం వెళ్లేందుకు వీల్లేదని మరోసారి స్పష్టం చేశారు. ఆగ్రహించిన పవన్ కల్యాణ్ రోడ్డుపై బైఠాయించారు. రైతులు కూడా అక్కడే కూర్చున్నారు. పోలీసులతో వాగ్వాదానికి దిగిన పవన్‌ ముళ్లకంచె దాటి ముందుకు సాగారు.

చెదరగొట్టిన పోలీసులు

రైతులతో కలిసి మందడం వైపు వెళ్తున్న పవన్‌కు పోలీసులు అడుగడుగునా అడ్డుతగిలారు. కొందరు రైతులు రోడ్డు పక్కకు దిగి పొలాల్లో గుండా పరుగులు తీశారు. వారిని పోలీసులు చెదరట్టగా... జనసేనాని మండిపడ్డారు. కాలినడకనే పవన్‌ మందడం చేరుకున్నారు.

ఇదీ చదవండి : ఇదిగో... నువ్ మాత్రం జాగ్రత్త సుమీ..!