అండగా నిలవాల్సిన ప్రభుత్వమే... ఇలా చేస్తే ఎలా...?

రాష్ట్రంలో పలుచోట్ల రైతులపై దాడులు, పంటల ధ్వంసం, బెదిరింపులపై తెదేపా అధినేత తీవ్రంగా స్పందించారు. వైకాపా కార్యకర్తల చర్యలను ఆక్షేపించారు. బాధితులకు న్యాయం జరిగేంత వరకు పోరాటం చేస్తామని చంద్రబాబు భరోసా ఇచ్చారు.

కడప జిల్లా జమ్మలమడుగులో ఏపుగా ఏదిగిన పత్తిపంటను పలువురు ధ్వంసం చేయటంపై తెలుగుదేశం పార్టీ అధినేత చంద్రబాబు ధ్వజమెత్తారు. జిల్లాలోని బేస్తవేముల గ్రామంలో నల్లబోతుల నాగయ్య... గత ఎన్నికల్లో తెలుగుదేశం పార్టీకి మద్ధతుగా నిలిచారు. ఇప్పుడు వైకాపా నాయకులు... అధికారులు, పోలీసులను అడ్డం పెట్టుకొని నాగయ్య బోర్‌ను సీజ్‌ చేశారు. ఈ చర్యను చంద్రబాబు తీవ్రంగా ఖండించారు.

పండించుకుంటున్న పత్తి పంటను సర్వనాశనం చేసి... రైతు నోటికాడి ముద్దను లాగేయడం అమానుషమని మండిపడ్డారు. వైకాపా అధికారంలోకి వచ్చినప్పటి నుంచి... రైతులను టార్గెట్‌ చేస్తూ దాడులకు దిగుతున్నారని ఆరోపించారు. అనంతపురం జిల్లా కళ్యాణదుర్గంలో 5 వేల 400 దానిమ్మ చెట్లను నరికివేసి... భూములను లాక్కున్నారని ఆగ్రహించారు. తూర్పు గోదావరిలో కొబ్బరి చెట్లను నరికేశారని ఆక్షేపించారు.

రైతులకు అండగా నిలవాల్సిన ప్రభుత్వం... ఇలా కక్షసాధింపు చర్యలకు దిగడం హేయమైన చర్య అని చంద్రబాబు దుయ్యబట్టారు. జగ్గయ్యపేటలో వడ్డెర వర్గీయులైన బత్తుల నరసమ్మ కుటుంబాన్ని వైకాపా నేతలు బెదిరించడం దుర్మార్గమని విమర్శించారు. రాష్ట్ర వ్యాప్తంగా తమ కార్యకర్తలపై ప్రభుత్వం చేస్తున్న దాడులు, బెదిరింపులపై తెలుగుదేశం పార్టీ ఎప్పుడూ పోరాటం చేస్తూనే ఉంటుందని స్పష్టం చేశారు.

ఇదీ చదవండి