ప్లాస్టిక్ వ్యర్థాల సమస్యకు వినూత్న పరిష్కార మార్గాన్ని చూపిస్తున్నారు ఒడిశాలోని ఖండగిరి మురికివాడల పిల్లలు. ప్లాస్టిక్ వ్యర్థాలతో రోబోలు, ఇతర వినూత్న ఉత్పత్తులు తయారుచేస్తూ కాలుష్య నివారణకు తమ వంతు కృషి చేస్తున్నారు.
ఖండగిరి మురికివాడల బాలలు ఇంజినీర్లు కాదు. కనీసం ఎలక్ట్రీషియన్లు కూడా కాదు. పెద్దగా సాంకేతిక పరిజ్ఞానమూ లేదు. అయినప్పటికీ వారి చిన్ని మనస్సుల్లో ప్లాస్టిక్ వ్యర్థాల సమస్యకు పరిష్కారం కనుగొనాలనే ఒక ఆలోచన జనించింది. వెంటనే కార్యరంగంలోకి దిగిన బాలలు తమ మురికివాడ సమీపంలోని ప్లాస్టిక్ వ్యర్థాలను సేకరించారు.
ప్లాస్టిక్ సీసాలు, వస్తువులు సేకరించి వాటితో రోబోలను తయారుచేశారు. ఇవి చూడడానికి హ్యూమనాయిడ్ రోబోల్లా ఉండటం విశేషం. అలాగే ప్లాస్టిక్ వ్యర్థాలతో గదులను శుభ్రంచేసే వాక్యూమ్ క్లీనర్స్ను, లాంతర్లను కూడా వారు రూపొందిస్తున్నారు. కొంతమంది స్వయంచాలకంగా తెరుచుకునే తలుపులు కూడా తయారుచేస్తున్నారు.
స్వయం కృషితోనే...
ఈ బాలలకు ఎలాంటి ఆర్థిక, సాంకేతిక సహకారం లేదు. అయినప్పటికీ కష్టపడి ఈ రోబోలు తయారు చేశారు. వారి అభిరుచిని, సృజనను చాటుకున్నారు.
ఈ బాలల కృషిని గుర్తించిన భువనేశ్వర్ ఉన్ముక్త ఫౌండేషన్.. గత కొంత కాలంగా సహకారం అందించడం ప్రారంభించింది. ప్రతిభావంతులైన పిల్లలకు ఉచితంగా నైపుణ్య శిక్షణ ఇప్పిస్తోంది. ఈ పేద పిల్లల ప్రయత్నం.. పర్యావరణానికి పొంచి ఉన్న ప్లాస్టిక్ ముప్పును కొంతైనా తగ్గించడానికి ఎంతో తోడ్పడుతుంది.
ఇదీ చూడండి: 'అంతులేని కన్నీటి గాథకు సత్వర న్యాయమే పరిష్కారం'
