Mutual Fund KYC New Rules : మ్యూచువల్ ఫండ్స్లో ఇన్వెస్ట్ చేస్తున్నారా? అయితే మీకో శుభవార్త. కేవైసీ నిబంధనల్ని స్టాక్‌ మార్కెట్ల నియంత్రణ సంస్థ 'సెక్యూరిటీస్‌ అండ్‌ ఎక్స్ఛేంజ్‌ బోర్డ్‌ ఆఫ్‌ ఇండియా' (సెబీ) మరింత సులభతరం చేసింది. కేవైసీ రిజిస్టర్డ్‌ స్టేటస్‌ కోసం ఆధార్- పాన్ లింక్‌ చేయడం తప్పనిసరి చేస్తూ తీసుకొచ్చిన నిబంధనల్ని సడలించింది. ఈమేరకు సెబీ సర్క్యులర్ను విడుదల చేసింది.
మోసాలకు చెక్!
బ్యాంకులు, ఫండ్‌ హౌస్లు, స్టాక్‌ బ్రోకర్లు పెట్టుబడి ప్రారంభించే ముందు గుర్తింపును ధ్రువీకరించే ప్రక్రియనే కేవైసీ అంటారు. పారదర్శక వాతావరణంలో మదుపరులు తమ పెట్టుబడులను నిర్వహించేందుకు వీలు కల్పించడం సహా, మోసపూరిత కార్యకలాపాలను నిరోధించేందుకు కేవైసీ ప్రక్రియను చేపడతారు. కాగా, అంతకుముందు పాన్- ఆధార్ లింక్‌ చేయకపోతే కేవైసీ హోల్డ్లో ఉండేది. అంటే తిరిగి పెట్టుబడులు పెట్టడానికి అనుమతి ఉండేది కాదు. ఈ కేవైసీ ప్రక్రియను 2024 మార్చి 31లోపు కచ్చితంగా పూర్తి చేయాలని 2023 అక్టోబర్‌లోనే సెబీ ఆదేశాలు జారీ చేసింది. లేదంటే మార్చి 31 నుంచి కొత్త పెట్టుబడులను అనుమతించమని స్పష్టం చేసింది. ఈ మార్పు కారణంగా అనేక మ్యూచువల్ ఫండ్‌ ఖాతాలు తాత్కాలిక సస్పెన్షన్కు గురయ్యాయి. కేవైసీ అసంపూర్తిగా ఉన్న 13 మిలియన్‌ ఖాతాలు ఇబ్బందుల్లో పడ్డాయి. మే 14న జారీ చేసిన సర్క్యులర్లో సెబీ ఈ నిబంధనల్ని సడలించింది.
తప్పనిసరి కాదు!
ఇప్పటి వరకు కేవైసీ ప్రక్రియను పూర్తి చేయాలంటే తప్పనిసరిగా పాన్ను ఆధార్తో లింక్‌ చేయాల్సి వచ్చేది. కానీ ఇకపై ఆధార్, పాస్పోర్ట్‌, డ్రైవింగ్‌ లైసెన్స్‌, ఓటర్‌ ఐడీ వంటి ఇతర పత్రాలతోనూ కేవైసీ రిజిస్టర్డ్‌ స్టేటస్‌ పొందొచ్చని సెబీ తెలిపింది. కేవైసీ రిజిస్టర్డ్‌ స్టేటస్‌ పొందిన మదుపరులు ఇప్పటికే పెట్టుబడులు కలిగి ఉన్న ఫండ్‌ హౌస్లతో మాత్రమే ట్రాన్సాక్షన్స్ చేయగలరు. కానీ కేవైసీ వ్యాలిడేట్‌ స్టేటస్‌ పొందాలంటే మాత్రం పాన్-ఆధార్ లింక్‌ చేయాలని పేర్కొంది. ఈ స్టేటస్‌ పొందిన పెట్టుబడిదారుల లావాదేవీలపై ఎటువంటి పరిమితులూ ఉండవు. కేవైసీ స్టేటస్‌ కోసం సీడీఎస్ఎల్‌ వెబ్సైట్కు వెళ్లి కేవైసీ ఎంక్వైరీపై క్లిక్‌ చేసి స్టేటస్‌ చెక్ చేసుకోవచ్చు.
‘స్త్రీధనం’, ‘భరణం’ ఒక్కటేనా? దానిపై భర్తకు, అత్తమామలకు హక్కు ఉంటుందా? - What Is Streedhan
పోస్టాఫీస్ సూపర్ స్కీమ్ - రోజుకు రూ.50 పొదుపు చేస్తే చేతికి రూ.30లక్షలు! - Gram Suraksha Yojana
