மத்திய அரசால் நாடாளுமன்றத்தின் இரு அவைகளிலும் கடந்தாண்டு டிசம்பர் மாதம் நிறைவேற்றப்பட்ட குடியுரிமை திருத்தச் சட்ட மசோதா, பின்னர் குடியரசுத் தலைவரின் ஒப்புதலோடு சட்டமாக வடிவம் பெற்றது. இந்த குடியுரிமை திருத்தச் சட்டத்தில் பாகிஸ்தான், ஆப்கானிஸ்தான், வங்கதேசம் உள்ளிட்ட நாடுகளில் மத ரீதியிலான துன்புறுத்தலை அடைந்து 2014 டிசம்பர் 31ஆம் தேதிக்கு முன் இந்தியாவில் குடிபெயர்ந்த ஹிந்துக்கள், சீக்கியர்கள், கிறிஸ்தவர்கள், ஜெயின், பார்சி, புத்த மதத்தினர் ஆகியோருக்கு குடியுரிமை வழங்க வழிவகை செய்யும்படியான விதிமுறைகள் இதில் இடம்பெற்றிருந்தன.
இதையடுத்து இந்த குடியுரிமை திருத்தச் சட்டம் இஸ்லாமிய மக்களுக்கு எதிராக இருப்பதாகக் கூறி நாடு முழுவதிலும் தற்போது வரை போராட்டம் நடைபெற்றுவருகிறது. அதிலும் குறிப்பாக டெல்லி, உத்தரப் பிரதேசம் மற்றும் அஸ்ஸாம் உள்ளிட்ட வடகிழக்கு மாநிலங்களில் பெரிய அளவிலான போராட்டங்கள் நடைபெற்றன.
மேலும் இந்த குடியுரிமை திருத்தச் சட்டத்திற்கு எதிராக பல்வேறு மாநிலங்களில் உள்ள உயர் நீதிமன்றங்கள், உச்ச நீதிமன்றத்திலும் பல மனுக்கள் தாக்கல் செய்யப்பட்டன. அதில் திமுக, இந்தியன் யூனியன் முஸ்லீம் லீக், இந்திய கம்யூனிஸ்ட், மக்கள் நீதி மய்யம் உள்ளிட்ட கட்சிகள் சார்பிலும், பல்வேறு அமைப்புகள் சார்பிலும் மனுக்கள் தாக்கல் செய்யப்பட்டன.
இந்தச் சட்டத்தை எதிர்த்து கேரள அரசும் உச்ச நீதிமன்றத்தில் மனு தாக்கல் செய்துள்ளது. இது தவிர கேரளா, பஞ்சாப் மாநில சட்டப்பேரவைகளில் குடியுரிமை திருத்தச் சட்டத்திற்கு எதிரான தீர்மானங்களும் நிறைவேற்றப்பட்டன. மேலும், இந்தச் சட்டத்தை தங்கள் மாநிலங்களில் நிறைவேற்ற மாட்டோம் என கேரளா, மேற்கு வங்க அரசுகள் தெரிவித்துள்ளன.
நாடு முழுவதிலும் உள்ள உயர் நீதிமன்றங்களில் நிலுவையில் உள்ள குடியுரிமை திருத்தச் சட்டத்திற்கு எதிரான மனுக்களின் விசாரணையை உச்ச நீதிமன்றத்திற்கு மாற்ற வேண்டும் எனக் கோரி, மத்திய அரசின் சார்பிலும் மனு தாக்கல் செய்யப்பட்டுள்ளது.
இதனிடையே குடியுரிமை திருத்தச் சட்டத்திற்கு எதிராகவும் ஆதரவாகவும் தாக்கல் செய்யப்பட்டுள்ள 140க்கும் மேற்பட்ட மனுக்களின் மீதான விசாரணை இன்று உச்ச நீதிமன்றத்தில் நடைபெறுகிறது. இந்த மனுக்களை தலைமை நீதிபதி எஸ்.ஏ. பாப்டே, நீதிபதிகள் அப்துல் நசீர், சஞ்சீவ் கானா ஆகியோர் அடங்கிய அமர்வு விசாரணை செய்யவுள்ளது.
இதையும் படிங்க:
