अमरावती Amravati Double Murder Case : गत काही दिवसांपासून शेजाऱ्यांमध्ये घरालगत असणाऱ्या खुल्या जागेवरुन वाद सुरू होता. या वादातून सोमवारी सायंकाळी आई आणि मुलाची लोखंडी सब्बलनं वार करुन खून करण्यात आला. अमरावती शहरातील मंगलधाम कॉलनी परिसरात असणाऱ्या बालाजी नगर इथं हे हत्याकांड घडलं. कुंदा देशमुख आणि सुरज देशमुख असं हत्या करण्यात आलेल्या आई आणि मुलाचं नाव आहे. तर देवानंद लोणारे असं दुहेरी हत्याकांड करणाऱ्या आरोपीचं नाव आहे.
दोन कुटुंबात जागेचा वाद : मंगलधाम कॉलनी परिसरातील बालाजी नगर इथं विजय देशमुख हे पत्नी कुंदा आणि मुलगा सुरज यांच्यासोबत राहतात. सुरज देशमुख हा एमआयडीसी इथं कामाला आहे. त्यांच्या शेजारी मोबाईलचा व्यवसाय करणारे देवानंद लोणारे हे राहतात. देशमुख आणि लोणारे कुटुंबामध्ये गत अनेक दिवसांपासून त्यांच्या घरालगत असणाऱ्या खुल्या भूखंडावरून वाद आहे. या वादातूनच सोमवारी पाच वाजेच्या सुमारास सुरज देशमुख हा एमआयडीसी येथून कामावरून परतला असताना देवानंद लोणारे यांनी त्याच्यासोबत वाद घातला.
अशी घडली दुहेरी खुनाची घटना : देवानंद लोणारे याच्या हल्ल्यात सुरज देशमुख गंभीर जखमी झाला असताना त्याचा आवाज ऐकून त्याची आई कुंदा देशमुख यादेखील घराबाहेर आल्या. यावेळी देवानंद लोणारे यानं कुंदा देशमुख यांच्या डोक्यात लोखंडी सब्बलनं वार केला. या घटनेत आई आणि मुलगा गंभीर जखमी झाले. कुंदा देशमुख आणि सुरज देशमुख रक्ताच्या थारोळ्यात पडले असताना घरात असणारे विजय देशमुख घराबाहेर आरडाओरड ऐकून बाहेर आले. त्यावेळी देवानंद लोणारे यानं विजय देशमुख यांच्यावर देखील सब्बलनं वार केला. या हल्ल्यात विजय देशमुख जखमी झाले. या घटनेबाबत परिसरातील नागरिकांनी पोलिसांना माहिती देताच पोलीस तत्काळ घटनास्थळी धावून आले. पोलिसांनी तिघांनाही उपचारासाठी जिल्हा सामान्य रुग्णालयात दाखल केलं. मात्र डॉक्टरांनी कुंदा देशमुख आणि सुरेश देशमुख यांना मृत घोषित केलं.
दुहेरी हत्याकांड करुन मारेकरी फरार : कुंदा देशमुख आणि त्यांचा मुलगा सुरज देशमुख यांच्यावर सब्बलनं वार करुन ठार मारणारा आरोपी देवानंद लोणारे हा या घटनेनंतर पसार झाला. त्यानं आपली पत्नी आणि मुलासह दुचाकीवर बसून पसार झाला. आई आणि मुलाच्या हत्याकांडामुळे अमरावती शहरात खळबळ उडाली. पोलीस उपायुक्त सागर पाटील, सहायक पोलीस आयुक्त कैलास फुंडकर यांनी घटनास्थळी दाखल होऊन घटनेचा आढावा घेतला. फ्रेजरपुरा पोलिसांनी या प्रकरणात गुन्हा दाखल केला असून फरार आरोपी देवानंद लोणारे याचा शोध पोलीस घेत आहेत.
हेही वाचा :
