গুৱাহাটী,হোজাই, 26 ডিচেম্বৰ : সঘনাই এটাৰ পাচত আন এটা পথ দুৰ্ঘটনা সংঘটিত হ'বলৈ ধৰিছে ৰাজ্যৰ ৰাজপথসমূহত ৷ ব্যতিক্ৰম নহ'ল বৃহস্পতিবাৰেও ৷ মহানগৰীৰ আদাবাৰীত পুৱাই সংঘটিত হ'ল ভয়াৱহ পথ দুৰ্ঘটনা ৷ তীব্ৰ বেগী বাছৰ খুন্দাত থিতাতে নিহত হয় এজন স্কুটী আৰোহী ৷ দুৰ্ঘটনাত নিহত হোৱা যুৱকজন গাড়ীগাঁৱৰ ফাৰহান নাদিম বুলি জানিব পৰা গৈছে ৷ উত্তৰ গুৱাহাটীৰ আমিনগাঁওস্থিত ফেকাল্টি কলেজৰ স্নাতকৰ ছাত্ৰ আছিল নাদিম ৷ দুৰ্ঘটনা সংঘটিত কৰিয়েই বাছ এৰি পলায়ন কৰে চালক-হেণ্ডিমেনে ৷ সম্প্ৰতি জালুকবাৰী যানবাহন আৰক্ষীয়ে জব্দ কৰে AS-20-1367 নম্বৰৰ অসম ৰাজ্যিক পৰিবহন নিগমৰ বাছখন ৷
আনহাতে, হোজাইৰ বৰবহাতো সংঘটিত হৈছে এক ভয়ংকৰ পথ দুৰ্ঘটনা ৷ AS-01BB-8774 নম্বৰৰ তীব্ৰবেগী এখন ইয়ন গাড়ীয়ে AS-01FC-6347 নম্বৰৰ ট্ৰাকখনৰ পিচফালেৰে খুন্দা মৰাৰ ফলত সংঘটিত হয় দুৰ্ঘটনাটো ৷ গুৰুতৰভাৱে আহত হয় এগৰাকী মহিলাকে ধৰি তিনিজন লোক ৷ আহত সকলক ততাতৈয়াকৈ চিকিৎসালয়ত ভৰ্তি কৰোৱা হয় ৷ ইতিমধ্যে নীলবাগান আৰক্ষী ঘটনাস্থলীত উপস্থিত হৈ জব্দ কৰে গাড়ী দুখন ৷
লগতে চাওকঃ দেউৰী লোকনৃত্য-গীতেৰে উখল-মাখল শ্ৰীপাণি
